jo tujhe paikar-e-sad-naz-o-ada kahte hain

jo tujhe paikar-e-sad-nāz-o-adā kahte haiñ

qadr-dāñ husn ke ye baat bajā kahte haiñ

us ke chehre kī ziyā se hai chamak sūraj kī

us kī bikhrī huī zulfoñ ko ghaTā kahte haiñ

vo jo āñkhoñ se pilā.e to chalo pī leñge

vaise ham piine pilāne ko burā kahte haiñ

surḳh hāthoñ kī haqīqat to hamī jānte haiñ

jo nahīñ jānte vo rañg-e-hinā kahte haiñ

baat achchhī hī vo karte haiñ hamāre haq meñ

jo hamāre liye kahte haiñ bajā kahte haiñ

saḳht pathrīlī zamīñ par bhī khilāte haiñ gulāb

sher ham kahte haiñ aur sab se sivā kahte haiñ

ye rivāyat hai zamāne kī na.ī baat nahīñ

hotī aa.ī hai ki achchhoñ ko burā kahte haiñ

aaj gahvāre meñ baiThe haiñ sabhī ahl-e-adab

is fazā hī ko mohabbat kī fazā kahte haiñ

ham ne kī mashq-e-suḳhan misra-e-'ġhālib' pe 'nadīm'

log is baare meñ ab dekhiye kyā kahte haiñ

jo tujhe paikar-e-sad-naz-o-ada kahte hain

qadr-dan husn ke ye baat baja kahte hain

us ke chehre ki ziya se hai chamak suraj ki

us ki bikhri hui zulfon ko ghaTa kahte hain

wo jo aankhon se pilae to chalo pi lenge

waise hum pine pilane ko bura kahte hain

surKH hathon ki haqiqat to hami jaante hain

jo nahin jaante wo rang-e-hina kahte hain

baat achchhi hi wo karte hain hamare haq mein

jo hamare liye kahte hain baja kahte hain

saKHt pathrili zamin par bhi khilate hain gulab

sher hum kahte hain aur sab se siwa kahte hain

ye riwayat hai zamane ki nai baat nahin

hoti aai hai ki achchhon ko bura kahte hain

aaj gahware mein baiThe hain sabhi ahl-e-adab

is faza hi ko mohabbat ki faza kahte hain

hum ne ki mashq-e-suKHan misra-e-'ghaalib' pe 'nadim'

log is bare mein ab dekhiye kya kahte hain