jo tu kahta hai ai ghafil ye mera hai ye tera hai

jo tū kahtā hai ai ġhāfil ye merā hai ye terā hai

ye jis kā hai usī kā hai na terā hai na merā hai

tū avval soch to dil meñ ki tū hai kaun aur kyā hai

namāzī hai sharābī hai uchakkā hai luTerā hai

farishta hai parī hai dev hai yā aadmī jin hai

balā hai bhuut hai yāmun mazūrā yā kamerā hai

jab in chīzoñ se tū apne ta.iiñ kuchh chiiz Thahrā le

to us ke ba.ad phir kahiyo ye merā hai ye terā hai

ye chīzeñ to ġharaz kyā haiñ tū apnā hī nahīñ mālik

tujhe o be-ḳhabar nādāñ ye kis ġhaflat ne gherā hai

tū kachche suut kā dhāgā abas bal pech khātā hai

ye sab vahm-e-ġhalat hai aur qusūr-e-fahm terā hai

tū kyā jaane ki tujh ko kis ne kis charḳhe meñ kaatā hai

tū kyā jaane ki tujh ko kis aTeran meñ अटेरा hai

tamāshā hai mazā hai sair hai kyā kyā ahāhāhā

musavvir ne ajab kuchh rang qudrat kā bikherā hai

taraqqī meñ tanazzul hai tanazzul meñ taraqqī hai

añdhere meñ ujālā hai ujāle meñ añdherā hai

tilismāt-e-haqīqī hai ye kuchh samjhā nahīñ jaatā

yahī chāñd aur yahī sūraj yahī shaam aur saverā hai

'nazīr' allāh allah is jahāñ meñ dam ġhanīmat hai

kahāñ ham aur kahāñ phir tum koī dam kā baserā hai

jo tu kahta hai ai ghafil ye mera hai ye tera hai

ye jis ka hai usi ka hai na tera hai na mera hai

tu awwal soch to dil mein ki tu hai kaun aur kya hai

namazi hai sharabi hai uchakka hai luTera hai

farishta hai pari hai dew hai ya aadmi jin hai

bala hai bhut hai yamun mazura ya kamera hai

jab in chizon se tu apne tain kuchh chiz Thahra le

to us ke baad phir kahiyo ye mera hai ye tera hai

ye chizen to gharaz kya hain tu apna hi nahin malik

tujhe o be-KHabar nadan ye kis ghaflat ne ghera hai

tu kachche sut ka dhaga abas bal pech khata hai

ye sab wahm-e-ghalat hai aur qusur-e-fahm tera hai

tu kya jaane ki tujh ko kis ne kis charKHe mein kata hai

tu kya jaane ki tujh ko kis aTeran mein अटेरा hai

tamasha hai maza hai sair hai kya kya ahahaha

musawwir ne ajab kuchh rang qudrat ka bikhera hai

taraqqi mein tanazzul hai tanazzul mein taraqqi hai

andhere mein ujala hai ujale mein andhera hai

tilismat-e-haqiqi hai ye kuchh samjha nahin jata

yahi chand aur yahi suraj yahi sham aur sawera hai

'nazir' allah allah is jahan mein dam ghanimat hai

kahan hum aur kahan phir tum koi dam ka basera hai