jo walihana lagan mujhko apne fan se hai

jo vālihāna lagan mujh ko apne fan se hai

isī tarah kī mohabbat mujhe vatan se hai

guzarnā garche hameñ tīrgī ke ban se hai

hamārā vāsta ummīd kī kiran se hai

vaqār-e-sar nahīñ dastār-o-tāj kā muhtāj

vaqār-e-sar jo hai qaa.em to bas kafan se hai

hai fasl-e-qurb koī dūriyāñ na phailā.e

mo.āmla to yahāñ ruuh kā badan se hai

go merī pyaas meñ shāmil hai āb-e-zam-zam bhī

pe parvarish to mirī gang aur jaman se hai

tirā bayān to ik inkishāf hai 'yūnus'

ki dil kī baat numāyāñ suḳhan suḳhan se hai

jo walihana lagan mujh ko apne fan se hai

isi tarah ki mohabbat mujhe watan se hai

guzarna garche hamein tirgi ke ban se hai

hamara wasta ummid ki kiran se hai

waqar-e-sar nahin dastar-o-taj ka muhtaj

waqar-e-sar jo hai qaem to bas kafan se hai

hai fasl-e-qurb koi duriyan na phailae

moamla to yahan ruh ka badan se hai

go meri pyas mein shamil hai aab-e-zam-zam bhi

pe parwarish to meri gang aur jaman se hai

tera bayan to ek inkishaf hai 'yunus'

ki dil ki baat numayan suKHan suKHan se hai