jo waqif hai zamane ke chalan se

jo vāqif hai zamāne ke chalan se

vo bach jā.egā daur-e-pur-fitan se

unhī kī hai pas-e-parda ye sāzish

bahut mash.hūr the jo bhol-pan se

sar-e-bātil jhukā hai aur jhukegā

raheñge ham hamesha bāñkpan se

jise tīr-o-tabar bhī kar na paa.e

liyā hai kaam ham ne vo suḳhan se

jo phūloñ se hamārī dostī hai

ka.ī kāñTe juḌe haiñ pairahan se

latāfat dekhiye urdu zabāñ kī

ki jaise phuul jhaḌte hoñ dahan se

tumheñ jab bhī taḳhayyul meñ utārā

na.ī ḳhushbū uThī hai phir badan se

kisī ke vāste ham ne bhī 'ushba'

chune haiñ phuul ulfat ke chaman se

jo waqif hai zamane ke chalan se

wo bach jaega daur-e-pur-fitan se

unhi ki hai pas-e-parda ye sazish

bahut mashhur the jo bhol-pan se

sar-e-baatil jhuka hai aur jhukega

rahenge hum hamesha bankpan se

jise tir-o-tabar bhi kar na pae

liya hai kaam hum ne wo suKHan se

jo phulon se hamari dosti hai

kai kanTe juDe hain pairahan se

latafat dekhiye urdu zaban ki

ki jaise phul jhaDte hon dahan se

tumhein jab bhi taKHayyul mein utara

nai KHushbu uThi hai phir badan se

kisi ke waste hum ne bhi 'ushba'

chune hain phul ulfat ke chaman se