jo zaKHm lage hain mere dil par nahin dekha

jo zaḳhm lage haiñ mire dil par nahīñ dekhā

tum ne mirā hāl-e-dil-e-muztar nahīñ dekhā

āñkhoñ meñ to barbādī-e-gulshan kā thā manzar

phūloñ kī taraf aañkh uThā kar nahīñ dekhā

taqdīr meñ the hī nahīñ ārām ke lamhe

ġhurbat meñ kaTī umr kabhī ghar nahīñ dekhā

shāyad koī dīvāna nahīñ aaj sar-e-rāh

hāthoñ meñ kisī tifl ke patthar nahīñ dekhā

katrā ke guzar jaatī hai jis dar se masarrat

nādār kā tum ne kabhī vo ghar nahīñ dekhā

maujoñ ke thapeḌoñ se na hogā kabhī vāqif

jis ne kabhī dariyā meñ utar kar nahīñ dekhā

thiiñ manzil-e-fardā kī taraf merī nigāheñ

maazī kī taraf maiñ ne palaT kar nahīñ dekhā

'ma.asūm' kahūñ kis se mohabbat kā fasāna

ik ḳhvāb thā jo maiñ ne mukarrar nahīñ dekhā

jo zaKHm lage hain mere dil par nahin dekha

tum ne mera haal-e-dil-e-muztar nahin dekha

aankhon mein to barbaadi-e-gulshan ka tha manzar

phulon ki taraf aankh uTha kar nahin dekha

taqdir mein the hi nahin aaram ke lamhe

ghurbat mein kaTi umr kabhi ghar nahin dekha

shayad koi diwana nahin aaj sar-e-rah

hathon mein kisi tifl ke patthar nahin dekha

katra ke guzar jati hai jis dar se masarrat

nadar ka tum ne kabhi wo ghar nahin dekha

maujon ke thapeDon se na hoga kabhi waqif

jis ne kabhi dariya mein utar kar nahin dekha

thin manzil-e-farda ki taraf meri nigahen

mazi ki taraf main ne palaT kar nahin dekha

'masum' kahun kis se mohabbat ka fasana

ek KHwab tha jo main ne mukarrar nahin dekha