jo zamane ko bahar-kaif dagha dete hain

jo zamāne ko bahar-kaif daġhā dete haiñ

kyā tamāsha hai vahī dars-e-vafā dete haiñ

zindagī bojh hai ye bojh uThānā hai muhāl

phir bhī mohsin mujhe jiine kī duā dete haiñ

ḳhūn-e-dil ḳhūn-e-jigar kis pe luTā.e koī

apne apnoñ hī ko jab ġhair banā dete haiñ

lāla-o-gul se maiñ manzil kā pata kyoñ pūchhūñ

raah ke ḳhaar hī jab raah batā dete haiñ

vaqt ke saath badal jaatī hai duniyā kī nazar

vaqt achchhā ho to dushman bhī duā dete haiñ

ḳhair guzrī rah-e-hastī meñ haiñ 'lāġhar' tanhā

log kahte haiñ ki rahbar bhī daġhā dete haiñ

jo zamane ko bahar-kaif dagha dete hain

kya tamasha hai wahi dars-e-wafa dete hain

zindagi bojh hai ye bojh uThana hai muhaal

phir bhi mohsin mujhe jine ki dua dete hain

KHun-e-dil KHun-e-jigar kis pe luTae koi

apne apnon hi ko jab ghair bana dete hain

lala-o-gul se main manzil ka pata kyon puchhun

rah ke KHar hi jab rah bata dete hain

waqt ke sath badal jati hai duniya ki nazar

waqt achchha ho to dushman bhi dua dete hain

KHair guzri rah-e-hasti mein hain 'laghar' tanha

log kahte hain ki rahbar bhi dagha dete hain