jo zindagi mein kabhi justuju nahin karta

jo zindagī meñ kabhī justujū nahīñ kartā

mirā ḳhudā bhī use suraḳh-rū nahīñ kartā

ye merā dil to dhaḌaktā hai zāhiran lekin

kisī bhī shai kī ye dil aarzū nahīñ kartā

kisī ke qurb ne mujh ko banā diyā shā.ir

vagarna shā.irī maiñ to kabhū nahīñ kartā

kisī ne dekh liyā to kahegā dīvāna

jo apnā chāk-e-garebāñ rafū nahīñ kartā

jo jaisā hai use vaisā hī ye dikhātā hai

ye aa.ina to kabhī bhī ġhulū nahīñ kartā

maiñ aise shaḳhs kī āñkhoñ ko paak samjhūñgā

nazar jo sū-e-zan-e-ḳhūb-rū nahīñ kartā

faqīr huuñ tire dar kā tujhe sadā dī hai

ai jān-e-jāñ maiñ sadā kū-ba-kū nahīñ kartā

vo jis ne beach ke zevar tujhe paḌhāyā thā

ajab hai phone tak us maañ ko tū nahīñ kartā

hamārā ishq abhī hāl-e-ehtizār meñ hai

to phir use koī kyoñ qibla-rū nahīñ kartā

mahak rahī haiñ fazā.eñ guloñ kī ḳhushbū se

chaman meñ rah ke tū ehsās-e-bū nahīñ kartā

zamīn-e-sher ho banjar to us zamīñ pe kabhī

daraḳht sher-o-suḳhan kā numū nahīñ kartā

kitāb-e-ishq ko chhūne ke vāste 'nūrī'

vuzū zarūrī hai to kyoñ vuzū nahīñ kartā

jo zindagi mein kabhi justuju nahin karta

mera KHuda bhi use suraKH-ru nahin karta

ye mera dil to dhaDakta hai zahiran lekin

kisi bhi shai ki ye dil aarzu nahin karta

kisi ke qurb ne mujh ko bana diya shair

wagarna shairi main to kabhu nahin karta

kisi ne dekh liya to kahega diwana

jo apna chaak-e-gareban rafu nahin karta

jo jaisa hai use waisa hi ye dikhata hai

ye aaina to kabhi bhi ghulu nahin karta

main aise shaKHs ki aankhon ko pak samjhunga

nazar jo su-e-zan-e-KHub-ru nahin karta

faqir hun tere dar ka tujhe sada di hai

ai jaan-e-jaan main sada ku-ba-ku nahin karta

wo jis ne beach ke zewar tujhe paDhaya tha

ajab hai phone tak us man ko tu nahin karta

hamara ishq abhi haal-e-ehtizar mein hai

to phir use koi kyon qibla-ru nahin karta

mahak rahi hain fazaen gulon ki KHushbu se

chaman mein rah ke tu ehsas-e-bu nahin karta

zamin-e-sher ho banjar to us zamin pe kabhi

daraKHt sher-o-suKHan ka numu nahin karta

kitab-e-ishq ko chhune ke waste 'nuri'

wuzu zaruri hai to kyon wuzu nahin karta