josh ubalta hai pighalti hai tamanna dil mein

josh ubaltā hai pighaltī hai tamannā dil meñ

aag hī aag hai is soz-sarāpā dil meñ

terā jalva hai ki rañgīn sā dhokā dil meñ

kabhī zulmat kabhī paidā hai ujālā dil meñ

ab nahīñ tere do-ālam kī zarūrat mujh ko

ishq ne tere basā dī na.ī duniyā dil meñ

apnī āñkheñ to uThā mahv-shuda jalve bhī

nazar ā.eñge tujhe anjuman-ārā dil meñ

naaz thā un ko ki har qaid se āzād haiñ vo

maiñ ne kar hī liyā pāband-e-tamannā dil meñ

phūñktā rahtā hai kaunain ko jin kā partav

be-zarar hai unhīñ jalvoñ kā tamāshā dil meñ

aap hī baada huuñ maiñ aap hī saaqī 'maḳhmūr'

sāġhar āñkhoñ meñ mirī aur hai miinā dil meñ

josh ubalta hai pighalti hai tamanna dil mein

aag hi aag hai is soz-sarapa dil mein

tera jalwa hai ki rangin sa dhoka dil mein

kabhi zulmat kabhi paida hai ujala dil mein

ab nahin tere do-alam ki zarurat mujh ko

ishq ne tere basa di nai duniya dil mein

apni aankhen to uTha mahw-shuda jalwe bhi

nazar aaenge tujhe anjuman-ara dil mein

naz tha un ko ki har qaid se aazad hain wo

main ne kar hi liya paband-e-tamanna dil mein

phunkta rahta hai kaunain ko jin ka partaw

be-zarar hai unhin jalwon ka tamasha dil mein

aap hi baada hun main aap hi saqi 'maKHmur'

saghar aankhon mein meri aur hai mina dil mein