juD jate toDe jate agar darmiyan se hum

juḌ jaate toḌe jaate agar darmiyāñ se ham

toḌe magar ga.e haiñ yahāñ se vahāñ se ham

duniyā pe ab yaqīn bhalā aa.e kis tarah

rahte haiñ apne aap se kuchh bad-gumāñ se ham

ham ko ḳhabar nahīñ hai ki jā.eñge ham kahāñ

ye bhī patā nahīñ hai ki aa.e kahāñ se ham

us kī dalīl ne kiyā is baar lā-javāb

har baar jiit jaate the zor-e-bayāñ se ham

pahuñche nahīñ zamīñ pe mu'allaq hī rah ga.e

kuchh is tarah se pheñke ga.e āsmāñ se ham

ab ke vahāñ lagī haiñ guloñ kī numā.isheñ

kāñTe baTor laa.e the jis gulsitāñ se ham

ham tez chal rahe the bahut is liye 'kamāl'

is jurm par nikāle ga.e kārvāñ se ham

juD jate toDe jate agar darmiyan se hum

toDe magar gae hain yahan se wahan se hum

duniya pe ab yaqin bhala aae kis tarah

rahte hain apne aap se kuchh bad-guman se hum

hum ko KHabar nahin hai ki jaenge hum kahan

ye bhi pata nahin hai ki aae kahan se hum

us ki dalil ne kiya is bar la-jawab

har bar jit jate the zor-e-bayan se hum

pahunche nahin zamin pe mu'allaq hi rah gae

kuchh is tarah se phenke gae aasman se hum

ab ke wahan lagi hain gulon ki numaishen

kanTe baTor lae the jis gulsitan se hum

hum tez chal rahe the bahut is liye 'kamal'

is jurm par nikale gae karwan se hum