juda jab tak teri zulfon se pech-o-KHam nahin honge

judā jab tak tirī zulfoñ se pech-o-ḳham nahīñ hoñge

sitam duniyā meñ baḌhte hī raheñge kam nahīñ hoñge

Dil-e-pur-ġham na hoñge dīda-e-pur-nam nahīñ hoñge

añdherā hogā us mahfil meñ jis meñ ham nahīñ hoñge

dilāse un ke jo dard-āshnā-e-ġham nahīñ hoñge

namak hī hoñge dil ke zaḳhm par marham nahīñ hoñge

agar baḌhtā rahā yūñhī ye saudā-e-sitamgārī

tumhī rusvā sar-e-bāzār hoge ham nahīñ hoñge

janāb-e-shaiḳh par afsos hai ham ne to samjhā thā

haram ke rahne vaale aise nā-mahram nahīñ hoñge

idhar aao tumhārī zulf ham ārāsta kar deñ

jo gesū ham sañvāreñge kabhī barham nahīñ hoñge

agarche 'ishq meñ marne kā ḳhatra hī ziyāda hai

magar marne ke Dar se marne vaale kam nahīñ hoñge

juda jab tak teri zulfon se pech-o-KHam nahin honge

sitam duniya mein baDhte hi rahenge kam nahin honge

Dil-e-pur-gham na honge dida-e-pur-nam nahin honge

andhera hoga us mahfil mein jis mein hum nahin honge

dilase un ke jo dard-ashna-e-gham nahin honge

namak hi honge dil ke zaKHm par marham nahin honge

agar baDhta raha yunhi ye sauda-e-sitamgari

tumhi ruswa sar-e-bazar hoge hum nahin honge

janab-e-shaiKH par afsos hai hum ne to samjha tha

haram ke rahne wale aise na-mahram nahin honge

idhar aao tumhaari zulf hum aarasta kar den

jo gesu hum sanwarenge kabhi barham nahin honge

agarche 'ishq mein marne ka KHatra hi ziyaada hai

magar marne ke Dar se marne wale kam nahin honge