juda kya ho gae tum se na phir yakja hue KHud se

judā kyā ho ga.e tum se na phir yakjā hue ḳhud se

milā vo iḳhtiyār āḳhir ki ham tanhā hue ḳhud se

tah-e-āb-e-dil-o-jāñ motiyoñ kī tarah rahte haiñ

jo manzar is jahān-e-ḳhāk meñ paidā hue ḳhud se

chhupā lete tirī sūrat ham apnī aañkh meñ dil meñ

lab-e-goyā ke hāthoñ kis liye rusvā hue ḳhud se

uḌī vo ḳhāk-e-dil sūrat nazar aatī nahīñ apnī

pareshāñ ho ga.e itne ki bargashta hue ḳhud se

vo jheleñ saḳhtiyāñ jaañ par ki dil patthar huā apnā

bachāyā is qadar ḳhud ko ki be-parvā hue ḳhud se

milā vo nuur āñkhoñ ko ki be saaya hue ham bhī

hijāb-e-lā-makāñ paayā jo be-parvā hue ḳhud se

paḌe the be-ḳhabar kab se ḳhamoshī ke samundar meñ

havā aisī chalī ham zamzama-pairā hue ḳhud se

ab is zauq-e-huzūrī ke maze kis se bayāñ kījiye

ham apnī ḳhalvatoñ meñ kis tarah goyā hue ḳhud se

'nadīm' apne safīne ko bahā kar le ga.e har-sū

jo tūfāñ qulzum-e-jāñ meñ mire barpā hue ḳhud se

juda kya ho gae tum se na phir yakja hue KHud se

mila wo iKHtiyar aaKHir ki hum tanha hue KHud se

tah-e-ab-e-dil-o-jaan motiyon ki tarah rahte hain

jo manzar is jahan-e-KHak mein paida hue KHud se

chhupa lete teri surat hum apni aankh mein dil mein

lab-e-goya ke hathon kis liye ruswa hue KHud se

uDi wo KHak-e-dil surat nazar aati nahin apni

pareshan ho gae itne ki bargashta hue KHud se

wo jhelen saKHtiyan jaan par ki dil patthar hua apna

bachaya is qadar KHud ko ki be-parwa hue KHud se

mila wo nur aankhon ko ki be saya hue hum bhi

hijab-e-la-makan paya jo be-parwa hue KHud se

paDe the be-KHabar kab se KHamoshi ke samundar mein

hawa aisi chali hum zamzama-paira hue KHud se

ab is zauq-e-huzuri ke maze kis se bayan kijiye

hum apni KHalwaton mein kis tarah goya hue KHud se

'nadim' apne safine ko baha kar le gae har-su

jo tufan qulzum-e-jaan mein mere barpa hue KHud se