jumbish-a-abru-e-qatil kabhi aisi to na thi

jumbish-a-abrū-e-qātil kabhī aisī to na thī

bulbul-e-jāñ mirī bismil kabhī aisī to na thī

va.ada-e-vasl kiyā kis ne diyā dam kis ne

be-qarārī tujhe ai dil kabhī aisī to na thī

ai shah-e-husn raqīb aap kā qādir niklā

fauj ushshāq kī be-dil kabhī aisī to na thī

mehrbāñ aa.e kidhar aaj kidhar niklā chāñd

rashk-aflāk ye mahfil kabhī aisī to na thī

vo mah-e-nau magar aayā kisī mahtābī par

chāñdnī ai mah-e-kāmil kabhī aisī to na thī

apne kāshāne se kyuuñ ġhair ke ghar ho aa.e

māh-rū aap kī manzil kabhī aisī to na thī

kis tarah vasl huā us gul-e-zebā se 'nasīm'

ḳhush-nasībī mujhe hāsil kabhī aisī to na thī

jumbish-a-abru-e-qatil kabhi aisi to na thi

bulbul-e-jaan meri bismil kabhi aisi to na thi

wada-e-wasl kiya kis ne diya dam kis ne

be-qarari tujhe ai dil kabhi aisi to na thi

ai shah-e-husn raqib aap ka qadir nikla

fauj ushshaq ki be-dil kabhi aisi to na thi

mehrban aae kidhar aaj kidhar nikla chand

rashk-aflak ye mahfil kabhi aisi to na thi

wo mah-e-nau magar aaya kisi mahtabi par

chandni ai mah-e-kaamil kabhi aisi to na thi

apne kashane se kyun ghair ke ghar ho aae

mah-ru aap ki manzil kabhi aisi to na thi

kis tarah wasl hua us gul-e-zeba se 'nasim'

KHush-nasibi mujhe hasil kabhi aisi to na thi