junun barsae patthar aasman ne mazra-e-jaan par

junūñ barsā.e patthar āsmāñ ne mazra-e-jāñ par

jafā-e-pīr sabqat le ga.ī bedād-e-tiflāñ par

lagāyā itr jab ham ne lab-e-rañgīn-e-jānāñ par

to goyā tel chhiḌkā ātish-e-la.al-e-badaḳhshāñ par

nahīñ ye mo.ajiza mauqūf kuchh mūsī-e-imrāñ par

pyāle haiñ yad-e-baizā kaf-e-pur-nūr-e-mastāñ par

kabhī chaltī nahīñ bād-e-bahārī apne gulshan meñ

vo bulbul huuñ ki vārafta huuñ maiñ gul-hā-e-hirmāñ par

bayāz-e-kū-e-jānāñ bulbul-e-shīrāz gar dekhe

sifat us bostāñ kī likkhe aurāq-e-gulistāñ par

kiyā qatl us ne mujh ko maiñ ne kī qātil kī ārā.ish

jamāyā ḳhuun kā lākhā lab-e-shamshīr-e-burrāñ par

pas-e-dīvār taḌpoge kahāñ tak shauq kahtā hai

kamand-e-āh se chaḌh jaao bām-e-qasr-e-jānāñ par

tasavvur bañdh gayā vahshat meñ kis ke rū-e-raushan kā

ki aalam vādī-e-aiman kā hai apne bayābāñ par

hamesha sabz rahtā hai gulistāñ jūd-o-baḳhshish kā

kabhī bād-e-ḳhizāñ chalte na dekhī bāġh-e-ehsāñ par

huā jaame se bāhar kis qadar shauq-e-shahādat hai

paḌī jis dam nazar qātil tirī shamshīr-e-uryāñ par

ye kis mehr-e-sip.har-e-husn ne rakkhe qadam apne

gumān-e-mahr hai har zarra-e-ḳhāk-e-shahīdāñ par

tumhārā muskurānā jāntā huuñ jaan kho.egā

karegī ek din barq-e-tabassum ḳhirman-e-jāñ par

nahīñ bas āj-kal sultān iqlīm-e-shahādat meñ

hai apne naam kā sikka zar-e-ganj-e-shahīdāñ par

miTā diiñ teziyāñ ai zo.af tū ne dasht-e-vahshat meñ

paḌā hai sūrat-e-tār-e-garebāñ chāk-e-dāmāñ par

banā kar til ruḳh-e-raushan pe vo shoḳhī se kahte haiñ

ye kājal ham ne paarā hai charāġh-e-māh-e-tābāñ par

unheñ parvā nahīñ hai kuchh na ho gar baaḌ kā Dorā

ki Dore Dālte haiñ yaar kī ham teġh-e-uryāñ par

dahan ho us ke paidā aur zabāñ us kī huvaidā ho

zabān-e-zaḳhm ko rakh duuñ zabān-e-teġh-e-burrāñ par

paḌā aks-e-shafaq to naaz se kahne lagā qātil

chaḌhā sone kā paanī gumbad-e-qabr-e-shahīdāñ par

hamāre yaar ne kiiñ chhup ke bāteñ pyaar kī ham se

lagāyā aaj poshīda ye marham zaḳhm-e-pinhāñ par

agar raushan karūñ us ko charāġh-e-dāġh-e-saudā se

dhuāñ zanjīr ban jaa.e sar-e-sham-e-shabistāñ par

huā dhokā jo ham ko teġh-e-ḳhūñ-ālūd qātil kā

galā ragḌā kiye ham mauja-e-ḳhūn-e-shahīdāñ par

mazāmīñ us ke jab bāñdhe to bandish saaf dī ham ne

jilā kar dī hamesha gauhar-e-mazmūn-e-dandāñ par

pas-e-murdan 'qalaq' ehsāñ kiyā ye nā-tavānī ne

subuk merā janāza ho gayā dosh-e-azīzāñ par

junun barsae patthar aasman ne mazra-e-jaan par

jafa-e-pir sabqat le gai bedad-e-tiflan par

lagaya itr jab hum ne lab-e-rangin-e-jaanan par

to goya tel chhiDka aatish-e-lal-e-badaKHshan par

nahin ye moajiza mauquf kuchh musi-e-imran par

pyale hain yad-e-baiza kaf-e-pur-nur-e-mastan par

kabhi chalti nahin baad-e-bahaari apne gulshan mein

wo bulbul hun ki warafta hun main gul-ha-e-hirman par

bayaz-e-ku-e-jaanan bulbul-e-shiraaz gar dekhe

sifat us bostan ki likkhe auraq-e-gulistan par

kiya qatl us ne mujh ko main ne ki qatil ki aaraish

jamaya KHun ka lakha lab-e-shamshir-e-burran par

pas-e-diwar taDpoge kahan tak shauq kahta hai

kamand-e-ah se chaDh jao baam-e-qasr-e-jaanan par

tasawwur bandh gaya wahshat mein kis ke ru-e-raushan ka

ki aalam wadi-e-aiman ka hai apne bayaban par

hamesha sabz rahta hai gulistan jud-o-baKHshish ka

kabhi baad-e-KHizan chalte na dekhi bagh-e-ehsan par

hua jame se bahar kis qadar shauq-e-shahadat hai

paDi jis dam nazar qatil teri shamshir-e-uryan par

ye kis mehr-e-siphar-e-husn ne rakkhe qadam apne

guman-e-mahr hai har zarra-e-KHak-e-shahidan par

tumhaara muskurana jaanta hun jaan khoega

karegi ek din barq-e-tabassum KHirman-e-jaan par

nahin bas aaj-kal sultan iqlim-e-shahadat mein

hai apne nam ka sikka zar-e-ganj-e-shahidan par

miTa din teziyan ai zoaf tu ne dasht-e-wahshat mein

paDa hai surat-e-tar-e-gareban chaak-e-daman par

bana kar til ruKH-e-raushan pe wo shoKHi se kahte hain

ye kajal hum ne para hai charagh-e-mah-e-taban par

unhen parwa nahin hai kuchh na ho gar baD ka Dora

ki Dore Dalte hain yar ki hum tegh-e-uryan par

dahan ho us ke paida aur zaban us ki huwaida ho

zaban-e-zaKHm ko rakh dun zaban-e-tegh-e-burran par

paDa aks-e-shafaq to naz se kahne laga qatil

chaDha sone ka pani gumbad-e-qabr-e-shahidan par

hamare yar ne kin chhup ke baaten pyar ki hum se

lagaya aaj poshida ye marham zaKHm-e-pinhan par

agar raushan karun us ko charagh-e-dagh-e-sauda se

dhuan zanjir ban jae sar-e-sham-e-shabistan par

hua dhoka jo hum ko tegh-e-KHun-alud qatil ka

gala ragDa kiye hum mauja-e-KHun-e-shahidan par

mazamin us ke jab bandhe to bandish saf di hum ne

jila kar di hamesha gauhar-e-mazmun-e-dandan par

pas-e-murdan 'qalaq' ehsan kiya ye na-tawani ne

subuk mera janaza ho gaya dosh-e-azizan par