junun-e-dil agar aamada-e-izhaar ho jae

junūn-e-dil agar āmāda-e-iz.hār ho jaa.e

bahār aane se pahle hī chaman bedār ho jaa.e

ḳhushī kaisī ḳhushī se vāsta kyā ġham parastoñ ko

musalsal ġham na ho to zindagī dushvār ho jaa.e

Thahar ai barq ye do-chār tinke jam.a to kar luuñ

bas itnī aur mohlat āshiyāñ tayyār ho jaa.e

atā kar haañ atā kar kā.enāt-e-dard ke mālik

ik aisā dard jo nā-qābil-e-iz.hār ho jaa.e

vo aa.eñ yā na aa.eñ ab maiñ āñkheñ band kartā huuñ

yūñhī shāyad mukammal intizār-e-yār ho jaa.e

ye tūfāñ ye talātum sirf merī zindagī tak hai

agar maiñ ġharq ho jā.ūñ to beḌā paar ho jaa.e

abhī qaabū hai dil par apnī barbādī pe hañstā huuñ

phir is ke ba.ad shāyad zabt-e-ġham dushvār ho jaa.e

nasheman par nasheman is tarah ta.amīr kartā jā

ki girte girte bijlī aap ḳhud bezār ho jaa.e

'sa.īd' ab kyā karūñgā paañv ke chhāloñ se tang aa kar

duā kartā huuñ saarā rāsta pur-ḳhār ho jaa.e

junun-e-dil agar aamada-e-izhaar ho jae

bahaar aane se pahle hi chaman bedar ho jae

KHushi kaisi KHushi se wasta kya gham paraston ko

musalsal gham na ho to zindagi dushwar ho jae

Thahar ai barq ye do-chaar tinke jama to kar lun

bas itni aur mohlat aashiyan tayyar ho jae

ata kar han ata kar kaenat-e-dard ke malik

ek aisa dard jo na-qabil-e-izhaar ho jae

wo aaen ya na aaen ab main aankhen band karta hun

yunhi shayad mukammal intizar-e-yar ho jae

ye tufan ye talatum sirf meri zindagi tak hai

agar main gharq ho jaun to beDa par ho jae

abhi qabu hai dil par apni barbaadi pe hansta hun

phir is ke baad shayad zabt-e-gham dushwar ho jae

nasheman par nasheman is tarah tamir karta ja

ki girte girte bijli aap KHud bezar ho jae

'said' ab kya karunga panw ke chhaalon se tang aa kar

dua karta hun sara rasta pur-KHar ho jae