junun-e-ishq hai safdar kahin ye dil se niklega

junūn-e-ishq hai 'safdar' kahīñ ye dil se niklegā

jo is kūche meñ aa.egā baḌī mushkil se niklegā

natīja kuchh to mere zabt-e-lā-hāsil se niklegā

chaman meñ aag chhiḌkegā jo naala dil se niklegā

nazar dil se na haT jaa.e kahīñ ai zauq-e-nazzāra

ki un kā kārvān-e-nāz isī manzil se niklegā

hirāsāñ kyoñ hai gar kashtī bhañvar meñ aa ga.ī dil kī

mohabbat kā safīna Duub kar sāhil se niklegā

simaT aa.eñ agar āñkhoñ meñ barq-e-husn kī lahreñ

to ik sho.ala jahāñ-afroz mere dil se niklegā

uḌaa.ī hai jo ḳhaak ahl-e-safar ne us ko chhaTne do

koī rasta isī gard-e-rah-e-manzil se niklegā

haram kyā but-kade bhī kar nahīñ sakte qubūl us ko

fareb-e-lutf khā kar jo tirī mahfil se niklegā

ḳhulūs-e-dil ye kahtā hai qadam aage baḌhā.e jā

koī ḳhud muskurā kar parda-e-mahmil se niklegā

vo ḳhud dekheñge apne husn kī ye ālam-āshobī

ye pahlū bhī mirī vāraftagī-e-dil se niklegā

sajā.e jā chukeñge jab bisāt-e-arsh ke taare

hamārā chāñd bhī hañs kar harīm-e-dil se niklegā

hamārī aarzū hai ḳhvāhish-e-mahbūb ke taabe

hamārā mudda.ā niklā to us ke dil se niklegā

mirī sho.ala-navā.ī phūñk degī bazm ko 'safdar'

pasīna sham.a kā bhī garmi-e-mahfil se niklegā

junun-e-ishq hai 'safdar' kahin ye dil se niklega

jo is kuche mein aaega baDi mushkil se niklega

natija kuchh to mere zabt-e-la-hasil se niklega

chaman mein aag chhiDkega jo nala dil se niklega

nazar dil se na haT jae kahin ai zauq-e-nazzara

ki un ka karwan-e-naz isi manzil se niklega

hirasan kyon hai gar kashti bhanwar mein aa gai dil ki

mohabbat ka safina Dub kar sahil se niklega

simaT aaen agar aankhon mein barq-e-husn ki lahren

to ek shoala jahan-afroz mere dil se niklega

uDai hai jo KHak ahl-e-safar ne us ko chhaTne do

koi rasta isi gard-e-rah-e-manzil se niklega

haram kya but-kade bhi kar nahin sakte qubul us ko

fareb-e-lutf kha kar jo teri mahfil se niklega

KHulus-e-dil ye kahta hai qadam aage baDhae ja

koi KHud muskura kar parda-e-mahmil se niklega

wo KHud dekhenge apne husn ki ye aalam-ashobi

ye pahlu bhi meri waraftagi-e-dil se niklega

sajae ja chukenge jab bisat-e-arsh ke tare

hamara chand bhi hans kar harim-e-dil se niklega

hamari aarzu hai KHwahish-e-mahbub ke tabe

hamara muddaa nikla to us ke dil se niklega

meri shoala-nawai phunk degi bazm ko 'safdar'

pasina shama ka bhi garmi-e-mahfil se niklega