junun-e-ishq ki aamadgi ne kuchh na diya

junūn-e-ishq kī āmādgī ne kuchh na diyā

yahāñ bhī ziist kī uftādgī ne kuchh na diyā

lahū kī mauj se bām-e-ḳhayāl raushan hai

damakte chāñd kī ustādgī ne kuchh na diyā

ye lab tumhāre nahīñ kar sake masīhā.ī

unheñ bhī vaqfa-e-vāmāñdgī ne kuchh na diyā

sameT laa.e the jitne bhī ḳhvāb the lekin

huzūr-e-dost bhī dīvāngī ne kuchh na diyā

maiñ dekhtī thī tire ḳhāl-o-ḳhad ko hairat se

magar ye kyā ki mirī sādgī ne kuchh na diyā

tumhārī jeb bhī ḳhālī tumhāre dil kī tarah

tumheñ bhī fursat-e-yak-bārgī ne kuchh na diyā

diye ke nuur meñ karte rahe safar saare

vo jin ko nisbat-e-sayyārgī ne kuchh na diyā

bhaTak rahe haiñ kisī ajnabī masāfat meñ

mah-o-nujūm ko āvārgī ne kuchh na diyā

vo log kaun haiñ jin ko ḳhudā nasīb huā

hameñ to dil tirī nazzārgī ne kuchh na diyā

ye aañkh aaj bhī dar par lagī huī hai 'sahar'

tamām umr kī bechārgī ne kuchh na diyā

junun-e-ishq ki aamadgi ne kuchh na diya

yahan bhi zist ki uftadgi ne kuchh na diya

lahu ki mauj se baam-e-KHayal raushan hai

damakte chand ki ustadgi ne kuchh na diya

ye lab tumhaare nahin kar sake masihai

unhen bhi waqfa-e-wamandgi ne kuchh na diya

sameT lae the jitne bhi KHwab the lekin

huzur-e-dost bhi diwangi ne kuchh na diya

main dekhti thi tere KHal-o-KHad ko hairat se

magar ye kya ki meri sadgi ne kuchh na diya

tumhaari jeb bhi KHali tumhaare dil ki tarah

tumhein bhi fursat-e-yak-bargi ne kuchh na diya

diye ke nur mein karte rahe safar sare

wo jin ko nisbat-e-sayyargi ne kuchh na diya

bhaTak rahe hain kisi ajnabi masafat mein

mah-o-nujum ko aawargi ne kuchh na diya

wo log kaun hain jin ko KHuda nasib hua

hamein to dil teri nazzargi ne kuchh na diya

ye aankh aaj bhi dar par lagi hui hai 'sahar'

tamam umr ki bechaargi ne kuchh na diya