junun-e-ishq mein shauq-e-ziyan tak kaun pahunchega

junūn-e-ishq meñ shauq-e-ziyāñ tak kaun pahuñchegā

yahāñ tak ham chale aa.e yahāñ tak kaun pahuñchegā

tumhārī bazm meñ ye soch kar ham muskurā.e haiñ

tumhārī bazm meñ soz-e-nihāñ tak kaun pahuñchegā

koī mandir meñ baiThā hai koī masjid meñ baiThā hai

batāo justujū-e-lā-makāñ tak kaun pahuñchegā

jahāñ har vaqt ho pesh-e-nazar bas maut kā khaTkā

vahāñ phir maqsad-e-umr-e-ravāñ tak kaun pahuñchegā

ye duniyā kho rahī hai jalva-hā-e-husn duniyā meñ

tumhāre husn aur mere bayāñ tak kaun pahuñchegā

yaqīn-e-dushmanāñ to hai yaqīn-e-dostāñ kyā hai

jahāñ merī nazar pahuñchī vahāñ tak kaun pahuñchegā

jise dekho vahī 'rāje' talabgār-e-masarrat hai

hamāre ranj-o-ġham kī dāstāñ tak kaun pahuñchegā

junun-e-ishq mein shauq-e-ziyan tak kaun pahunchega

yahan tak hum chale aae yahan tak kaun pahunchega

tumhaari bazm mein ye soch kar hum muskurae hain

tumhaari bazm mein soz-e-nihan tak kaun pahunchega

koi mandir mein baiTha hai koi masjid mein baiTha hai

batao justuju-e-la-makan tak kaun pahunchega

jahan har waqt ho pesh-e-nazar bas maut ka khaTka

wahan phir maqsad-e-umr-e-rawan tak kaun pahunchega

ye duniya kho rahi hai jalwa-ha-e-husn duniya mein

tumhaare husn aur mere bayan tak kaun pahunchega

yaqin-e-dushmanan to hai yaqin-e-dostan kya hai

jahan meri nazar pahunchi wahan tak kaun pahunchega

jise dekho wahi 'raje' talabgar-e-masarrat hai

hamare ranj-o-gham ki dastan tak kaun pahunchega