junun-e-ishq se hal ye sawal ho na saka

junūn-e-ishq se hal ye savāl ho na sakā

shu.ūr ho na sakā yā visāl ho na sakā

firāq-e-parda-e-husn-o-jamāl ho na sakā

judā nazar se faroġh-e-ḳhayāl ho na sakā

zahe surūr-e-tamanna zahe nashāt-e-umīd

vafūr-e-kaif-e-talab meñ savāl ho na sakā

sitam sitam se jhalaktī rahī bahār-e-karam

kabhī jalāl hijāb-e-jamāl ho na sakā

jo ashk aañkh meñ aaya vo muskurātā huā

dil-e-malūl ḳharāb-e-malāl ho na sakā

jarāhatoñ meñ izāfa to ho gayā ai dil

talāfiyoñ se agar indimāl ho na sakā

fasurda ho ke ġham-e-dost jis se ruuTh gayā

kisī ḳhushī se vo dil phir nihāl ho na sakā

hijāb-e-sher-o-suḳhan meñ bahā.e laakh aañsū

magar faro kabhī dil kā ubaal ho na sakā

junun-e-ishq se hal ye sawal ho na saka

shuur ho na saka ya visal ho na saka

firaq-e-parda-e-husn-o-jamal ho na saka

juda nazar se farogh-e-KHayal ho na saka

zahe surur-e-tamanna zahe nashat-e-umid

wafur-e-kaif-e-talab mein sawal ho na saka

sitam sitam se jhalakti rahi bahaar-e-karam

kabhi jalal hijab-e-jamal ho na saka

jo ashk aankh mein aaya wo muskuraata hua

dil-e-malul KHarab-e-malal ho na saka

jarahaton mein izafa to ho gaya ai dil

talafiyon se agar indimal ho na saka

fasurda ho ke gham-e-dost jis se ruTh gaya

kisi KHushi se wo dil phir nihaal ho na saka

hijab-e-sher-o-suKHan mein bahae lakh aansu

magar faro kabhi dil ka ubaal ho na saka