junun-e-shauq-e-mohabbat hai kya kiya jae

junūn-e-shauq-e-mohabbat hai kyā kiyā jaa.e

yahī to rang-e-tabī'at hai kyā kiyā jaa.e

jo apne haath meñ patthar uThā.e phirte haiñ

unhīñ se mujh ko 'aqīdat hai kyā kiyā jaa.e

zamāna mere fasāne se ḳhuub vāqif hai

kisī ko phir bhī shikāyat hai kyā kiyā jaa.e

koī ye jā ke batā de mire raqīboñ se

mujhe to un se bhī ulfat hai kyā kiyā jaa.e

maiñ jab bhī miltā huuñ dil merā saaf hotā hai

udhar to sho’la-e-nafrat hai kyā kiyā jaa.e

hai dil meñ buġhz-o-'inād-o-hasad riyā-kārī

unhīñ kī sirf ye 'ādat hai kyā kiyā jaa.e

samajh sake na vo ab tak havāoñ ke ruḳh ko

mizāj-e-ahl-e-siyāsat hai kyā kiyā jaa.e

ġhasab jo kartā hai ab bhī huqūq auroñ ke

sunā hai sāhab-e-sarvat hai kyā kiyā jaa.e

haiñ but chhupā.e hue apnī āstīnoñ meñ

zabāñ pe kalma-e-vahdat hai kyā kiyā jaa.e

usī ko aaj bhī 'bismil' navāztā hai jahāñ

jo nang-e-fahm-o-farāsat hai kyā kiyā jaa.e

junun-e-shauq-e-mohabbat hai kya kiya jae

yahi to rang-e-tabi'at hai kya kiya jae

jo apne hath mein patthar uThae phirte hain

unhin se mujh ko 'aqidat hai kya kiya jae

zamana mere fasane se KHub waqif hai

kisi ko phir bhi shikayat hai kya kiya jae

koi ye ja ke bata de mere raqibon se

mujhe to un se bhi ulfat hai kya kiya jae

main jab bhi milta hun dil mera saf hota hai

udhar to sho’la-e-nafrat hai kya kiya jae

hai dil mein bughz-o-'inad-o-hasad riya-kari

unhin ki sirf ye 'adat hai kya kiya jae

samajh sake na wo ab tak hawaon ke ruKH ko

mizaj-e-ahl-e-siyasat hai kya kiya jae

ghasab jo karta hai ab bhi huquq auron ke

suna hai sahab-e-sarwat hai kya kiya jae

hain but chhupae hue apni aastinon mein

zaban pe kalma-e-wahdat hai kya kiya jae

usi ko aaj bhi 'bismil' nawazta hai jahan

jo nang-e-fahm-o-farasat hai kya kiya jae