junun-e-shauq ka hasil na tum samjhe na hum samjhe

junūn-e-shauq kā hāsil na tum samjhe na ham samjhe

kahāñ donoñ kī hai manzil na tum samjhe na ham samjhe

Dubonā chāhtī thiiñ jo bhī ham donoñ kī kashtī ko

unhīñ maujoñ meñ thā sāhil na tum samjhe na ham samjhe

tamannāoñ ke tūfānoñ ne fursat hī na milne dī

maqāmāt-e-nigāh-o-dil na tum samjhe na ham samjhe

mohabbat ne kuchh aisā hausla baḳhshā thā donoñ ko

kisī mushkil ko bhī mushkil na tum samjhe na ham samjhe

shadīd ehsās-e-qurbat se jahāñ mad.hosh the ham tum

vahīñ thā imtihān-e-dil na tum samjhe na ham samjhe

mohabbat sirf iz.hār-e-mohabbat ko nahīñ kahte

fareb-e-sa.ī-e-lā-hāsil na tum samjhe na ham samjhe

vafā kā ahd kaisī sādgī ke saath kar baiThe

vafā hai kis qadar mushkil na tum samjhe na ham samjhe

sabhī begāna the zāhir meñ ham donoñ kī hālat se

magar koī na thā ġhāfil na tum samjhe na ham samjhe

vo kahte haiñ hameñ bhī 'kaif' rusvā kar diyā tum ne

magar rusvā.ī kā hāsil na tum samjhe na ham samjhe

junun-e-shauq ka hasil na tum samjhe na hum samjhe

kahan donon ki hai manzil na tum samjhe na hum samjhe

Dubona chahti thin jo bhi hum donon ki kashti ko

unhin maujon mein tha sahil na tum samjhe na hum samjhe

tamannaon ke tufanon ne fursat hi na milne di

maqamat-e-nigah-o-dil na tum samjhe na hum samjhe

mohabbat ne kuchh aisa hausla baKHsha tha donon ko

kisi mushkil ko bhi mushkil na tum samjhe na hum samjhe

shadid ehsas-e-qurbat se jahan madhosh the hum tum

wahin tha imtihan-e-dil na tum samjhe na hum samjhe

mohabbat sirf izhaar-e-mohabbat ko nahin kahte

fareb-e-sai-e-la-hasil na tum samjhe na hum samjhe

wafa ka ahd kaisi sadgi ke sath kar baiThe

wafa hai kis qadar mushkil na tum samjhe na hum samjhe

sabhi begana the zahir mein hum donon ki haalat se

magar koi na tha ghafil na tum samjhe na hum samjhe

wo kahte hain hamein bhi 'kaif' ruswa kar diya tum ne

magar ruswai ka hasil na tum samjhe na hum samjhe