junun-e-shauq ki rahon mein jab apne qadam nikle

junūn-e-shauq kī rāhoñ meñ jab apne qadam nikle

nigār-e-husn kī zulfoñ ke saare pech-o-ḳham nikle

ye be-nūrī mire ghar ke ujāloñ kī ma.āz-allāh

agar dekheñ añdhere to añdheroñ kā bhī dam nikle

ubhāre jā.iye jab tak na ubhre naqsh kāġhaz par

tarāshe jā.iye jab tak na patthar se sanam nikle

nahīñ dekhā thā jab tak ḳhud ko samjhe the na jaane kyā

shu.ūr-e-ishq le kar ā.ina-ḳhāne se ham nikle

ye hasrat hai sajā luuñ apne hoñToñ par hañsī meñ bhī

ghaḌī bhar ko mire dil se agar ehsās-e-ġham nikle

farāz-e-arsh tak kaise pahuñchte vo bhalā 'shāhid'

fazā-e-tūr kī had se na aage jo qadam nikle

junun-e-shauq ki rahon mein jab apne qadam nikle

nigar-e-husn ki zulfon ke sare pech-o-KHam nikle

ye be-nuri mere ghar ke ujalon ki maaz-allah

agar dekhen andhere to andheron ka bhi dam nikle

ubhaare jaiye jab tak na ubhre naqsh kaghaz par

tarashe jaiye jab tak na patthar se sanam nikle

nahin dekha tha jab tak KHud ko samjhe the na jaane kya

shuur-e-ishq le kar aaina-KHane se hum nikle

ye hasrat hai saja lun apne honTon par hansi mein bhi

ghaDi bhar ko mere dil se agar ehsas-e-gham nikle

faraaz-e-arsh tak kaise pahunchte wo bhala 'shahid'

faza-e-tur ki had se na aage jo qadam nikle