junun-e-shauq ko diwana-pan kahna hi paDta hai

junūn-e-shauq ko dīvāna-pan kahnā hī paḌtā hai

yahāñ to rāhbar ko rāhzan kahnā hī paḌtā hai

tasavvur ko tire jalva-fagan kahnā hī paḌtā hai

hameñ tanhā.ī ko bhī anjuman kahnā hī paḌtā hai

ye majbūrī ye māyūsī ye pābandī are tauba

musībat meñ qafas ko bhī chaman kahnā hī paḌtā hai

kuchh is andāz ke mujh se mujhe āzār pahuñche haiñ

har ik se qissa-e-ranj-o-mehan kahnā hī paḌtā hai

miTāne meñ mire koī kamī tū ne na kī lekin

tujhe is par bhī rūh-e-jān-o-tan kahnā hī paḌtā hai

jidhar dekhā hazāroñ zindagī se haath dho baiThe

tire abrū ko teġh-e-saf-shikan kahnā hī paḌtā hai

ma.āl-e-bāryābī kyā batā.ūñ muḳhtasar ye hai

ki shām-e-ġham ko bhī sub.h-e-vatan kahnā hī paḌtā hai

junun-e-shauq ko diwana-pan kahna hi paDta hai

yahan to rahbar ko rahzan kahna hi paDta hai

tasawwur ko tere jalwa-fagan kahna hi paDta hai

hamein tanhai ko bhi anjuman kahna hi paDta hai

ye majburi ye mayusi ye pabandi are tauba

musibat mein qafas ko bhi chaman kahna hi paDta hai

kuchh is andaz ke mujh se mujhe aazar pahunche hain

har ek se qissa-e-ranj-o-mehan kahna hi paDta hai

miTane mein mere koi kami tu ne na ki lekin

tujhe is par bhi ruh-e-jaan-o-tan kahna hi paDta hai

jidhar dekha hazaron zindagi se hath dho baiThe

tere abru ko tegh-e-saf-shikan kahna hi paDta hai

maal-e-baryabi kya bataun muKHtasar ye hai

ki sham-e-gham ko bhi subh-e-watan kahna hi paDta hai