junun-e-shauq mein aashufta-samanon pe kya guzri

junūn-e-shauq meñ āshufta-sāmānoñ pe kyā guzrī

ḳhirad-mandoñ pe kyā biitī garebānoñ pe kī guzrī

vo jin ke ḳhuun se rangīñ tumhārī bazm-e-ishrat hai

kabhī sochā hai un majbūr insānoñ pe kyā guzrī

mirā ḳhūn-e-jigar to gulsitāñ ke kaam aaya hai

batā.ūñ kis tarah āḳhir bayābānoñ pe kyā guzrī

hamāre dam se qaa.em thī bahār-e-gulshan-o-sahrā

hamāre baad gulshan aur vīrānoñ pe kyā guzrī

ujāloñ ke binā jo ek lamha jī na paate the

shab-e-zulmāt meñ aise sanam-ḳhānoñ pe kyā guzrī

hamārā azm guzrā muskurā kar har havādis se

hameñ sāhil milā jis vaqt tūfānoñ pe kyā guzrī

bahut ma.asūm haiñ 'nāshād' kar ke ham ko dīvāna

hamīñ se pūchhte haiñ chāk-dāmānoñ pe kyā guzrī

junun-e-shauq mein aashufta-samanon pe kya guzri

KHirad-mandon pe kya biti garebanon pe ki guzri

wo jin ke KHun se rangin tumhaari bazm-e-ishrat hai

kabhi socha hai un majbur insanon pe kya guzri

mera KHun-e-jigar to gulsitan ke kaam aaya hai

bataun kis tarah aaKHir bayabanon pe kya guzri

hamare dam se qaem thi bahaar-e-gulshan-o-sahra

hamare baad gulshan aur viranon pe kya guzri

ujalon ke bina jo ek lamha ji na pate the

shab-e-zulmat mein aise sanam-KHanon pe kya guzri

hamara azm guzra muskura kar har hawadis se

hamein sahil mila jis waqt tufanon pe kya guzri

bahut masum hain 'nashad' kar ke hum ko diwana

hamin se puchhte hain chaak-damanon pe kya guzri