junun-e-shauq mein aisa bhi waqt aata hai insan par

junūn-e-shauq meñ aisā bhī vaqt aatā hai insāñ par

ki aatī hai hañsī ḳhud apne hī jaib-o-garebāñ par

kalī ḳhāmosh phuul afsurda shabnam har nafas giryāñ

maiñ hairāñ huuñ ki ro.uuñ yā hañsūñ fasl-e-bahārāñ par

bahār-e-sumbul-o-raihāñ se tanhā khele vaale

baḌe ehsān haiñ mere bhī is sehn-e-gulistāñ par

bujhe dil kā fasāna chheḌne vaalo Thahar jaao

mujhe mātam to kar lene do is rasm-e-charāġhāñ par

har ik ko dekh kar ālūda-e-isyāñ ye Dartā huuñ

kahīñ mujh ko na sharmānā paḌe pākī-e-dāmāñ par

kuchh is andāz se kashtī ko le Dūbīñ sar-e-sāhil

ki 'muslim' mujh ko pyaar aa hī gayā amvāj-e-tūfāñ par

junun-e-shauq mein aisa bhi waqt aata hai insan par

ki aati hai hansi KHud apne hi jaib-o-gareban par

kali KHamosh phul afsurda shabnam har nafas giryan

main hairan hun ki roun ya hansun fasl-e-bahaaran par

bahaar-e-sumbul-o-raihan se tanha khele wale

baDe ehsan hain mere bhi is sehn-e-gulistan par

bujhe dil ka fasana chheDne walo Thahar jao

mujhe matam to kar lene do is rasm-e-charaghan par

har ek ko dekh kar aaluda-e-isyan ye Darta hun

kahin mujh ko na sharmana paDe paki-e-daman par

kuchh is andaz se kashti ko le Dubin sar-e-sahil

ki 'muslim' mujh ko pyar aa hi gaya amwaj-e-tufan par