junun-e-shauq mein kuchh aisa kho gaya hun main

junūn-e-shauq meñ kuchh aisā kho gayā huuñ maiñ

ki vo nazar meñ haiñ aur un ko DhūñDhtā huuñ maiñ

kafan se is liye ab muñh ko Dhāñptā huuñ maiñ

gunāhgār huuñ duniyā se jā rahā huuñ maiñ

tirī talāsh tirī justujū tirī dhun meñ

adam se ālam-e-hastī meñ aa gayā huuñ maiñ

kafan kī uuprī chādar bhī khiñch ga.ī tan se

luTā huuñ jab sar-e-manzil pahuñch gayā huuñ maiñ

na jaane ye mirī qismat hai yā tirī hikmat

jo mil gayā hai kahīñ tū to kho gayā huuñ maiñ

na raushnī hai koī raah meñ na rahbar hai

akelā manzil-e-maqsad pe jā rahā huuñ maiñ

ye zindagī bhī koī zindagī hai ai 'nashtar'

kisī kī ek jhalak ko taras rahā huuñ maiñ

junun-e-shauq mein kuchh aisa kho gaya hun main

ki wo nazar mein hain aur un ko DhunDhta hun main

kafan se is liye ab munh ko Dhanpta hun main

gunahgar hun duniya se ja raha hun main

teri talash teri justuju teri dhun mein

adam se aalam-e-hasti mein aa gaya hun main

kafan ki upri chadar bhi khinch gai tan se

luTa hun jab sar-e-manzil pahunch gaya hun main

na jaane ye meri qismat hai ya teri hikmat

jo mil gaya hai kahin tu to kho gaya hun main

na raushni hai koi rah mein na rahbar hai

akela manzil-e-maqsad pe ja raha hun main

ye zindagi bhi koi zindagi hai ai 'nashtar'

kisi ki ek jhalak ko taras raha hun main