junun hai dasht hai tanhaiyan hain aur main hun

junūñ hai dasht hai tanhā.iyāñ haiñ aur maiñ huuñ

azal se bādiya-paimā.iyāñ haiñ aur maiñ huuñ

mirī ġhazal meñ haiñ qaus-e-quzah ke sātoñ rang

urūs-e-fikr kī añgḌā.iyāñ haiñ aur maiñ huuñ

kahāñ mahāz-e-suḳhan aur kahāñ mirā jaisā

bas us kī hausla-afzā.iyāñ haiñ aur maiñ huuñ

vahī hai merā muhāfiz vahī nigahbāñ hai

ki mere donoñ taraf khā.iyāñ haiñ aur maiñ huuñ

na pūchhiye mire aish-o-nishāt ke asbāb

sunahre ḳhvāboñ kī ra.anā.iyāñ haiñ aur maiñ huuñ

harā-bharā na rahe kis liye mirā har zaḳhm

ki hādsāt kī purvā.iyāñ haiñ aur maiñ huuñ

akele-pan kā jo ehsās thā vo ab bhī hai

nazar-fareb shanāsā.iyāñ haiñ aur maiñ huuñ

hirās ḳhauf sarāsīmgī dhuāñ ātish

guzishta ahd kī parchhā.iyāñ haiñ aur maiñ huuñ

suḳhan-shanāsoñ kī mahfil meñ aaj ai 'rahbar'

rubā.iyāt haiñ chaupā.iyāñ haiñ aur maiñ huuñ

junun hai dasht hai tanhaiyan hain aur main hun

azal se baadiya-paimaiyan hain aur main hun

meri ghazal mein hain qaus-e-quzah ke saton rang

urus-e-fikr ki angDaiyan hain aur main hun

kahan mahaz-e-suKHan aur kahan mera jaisa

bas us ki hausla-afzaiyan hain aur main hun

wahi hai mera muhafiz wahi nigahban hai

ki mere donon taraf khaiyan hain aur main hun

na puchhiye mere aish-o-nishat ke asbab

sunahre KHwabon ki ranaiyan hain aur main hun

hara-bhara na rahe kis liye mera har zaKHm

ki hadsat ki purwaiyan hain aur main hun

akele-pan ka jo ehsas tha wo ab bhi hai

nazar-fareb shanasaiyan hain aur main hun

hiras KHauf sarasimgi dhuan aatish

guzishta ahd ki parchhaiyan hain aur main hun

suKHan-shanason ki mahfil mein aaj ai 'rahbar'

rubaiyat hain chaupaiyan hain aur main hun