junun jab muskuraata hai KHirad ki gul-fishani par

junūñ jab muskurātā hai ḳhirad kī gul-fishānī par

vo aalam ik qayāmat hai irādoñ kī javānī par

hañsī aatī rahī phūloñ ko merī be-zabānī par

rahā maġhmūm maiñ jitnā ma.āl-e-shādmānī par

agar vaa.iz tujhe apnā taqaddus sauñp saktā hai

maiñ kar duuñ mai-kade qurbān terī naujavānī par

ridā-e-kaif-o-mastī oḌh leñ saaqī ye maiḳhāne

vo bikhrā deñ jo zulfoñ ko sharāb-e-arġhavānī par

hañsī uḌtī hai ġhunchoñ ke baḌe dilkash tabassum kī

vahāñ tanqīd ho jaatī hai kaliyoñ kī javānī par

ye kis ne rū-e-zebā se naqāb ulTā gulistāñ meñ

bahāroñ kī tabī.at aa ga.ī 'anjum' ravānī par

junun jab muskuraata hai KHirad ki gul-fishani par

wo aalam ek qayamat hai iradon ki jawani par

hansi aati rahi phulon ko meri be-zabani par

raha maghmum main jitna maal-e-shadmani par

agar waiz tujhe apna taqaddus saunp sakta hai

main kar dun mai-kade qurban teri naujawani par

rida-e-kaif-o-masti oDh len saqi ye maiKHane

wo bikhra den jo zulfon ko sharab-e-arghawani par

hansi uDti hai ghunchon ke baDe dilkash tabassum ki

wahan tanqid ho jati hai kaliyon ki jawani par

ye kis ne ru-e-zeba se naqab ulTa gulistan mein

bahaaron ki tabiat aa gai 'anjum' rawani par