junun ka daur hai kis kis ko jaen samjhane

junūñ kā daur hai kis kis ko jaa.eñ samjhāne

udhar bhī hosh ke dushman idhar bhī dīvāne

karam karam hai to hai faiz-e-ām is kā shi.ār

ye dasht hai vo gulistāñ sahāb kyā jaane

kisī meñ dam nahīñ ahl-e-sitam se kuchh bhī kahe

sitam-zadoñ ko har ik aa rahā hai samjhāne

bashar ke zauq-e-parastish ne ḳhud kiye taḳhlīq

ḳhudā-o-ka.aba kahīñ aur kahīñ sanam-ḳhāne

ulajh ke rah ga.ī husn-e-naqāb meñ jo nazar

vo husn-e-jalva-e-zer-e-naqāb kyā jaane

is irtiqā-e-tamaddun ko kyā kahūñ 'mullā'

haiñ sham.eñ shoḳh-tar āvāra-tar haiñ parvāne

junun ka daur hai kis kis ko jaen samjhane

udhar bhi hosh ke dushman idhar bhi diwane

karam karam hai to hai faiz-e-am is ka shiar

ye dasht hai wo gulistan sahab kya jaane

kisi mein dam nahin ahl-e-sitam se kuchh bhi kahe

sitam-zadon ko har ek aa raha hai samjhane

bashar ke zauq-e-parastish ne KHud kiye taKHliq

KHuda-o-kaba kahin aur kahin sanam-KHane

ulajh ke rah gai husn-e-naqab mein jo nazar

wo husn-e-jalwa-e-zer-e-naqab kya jaane

is irtiqa-e-tamaddun ko kya kahun 'mulla'

hain shamen shoKH-tar aawara-tar hain parwane