junun ke dam se aaKHir martaba kaisa mila mujhko

junūñ ke dam se āḳhir martaba kaisā milā mujh ko

abhī farhād-o-qais aa.e the kahne marhabā mujh ko

kisī sūrat bhī rad hotā nahīñ ye faisla dil kā

nazar aatā nahīñ koī bhī tujh sā dūsrā mujh ko

sar-e-kunj-e-tamannā phir ḳhushī se gungunā.uñgā

agar vo lauT kar aa.e to phir tum dekhnā mujh ko

na jān-e-rashk se ġhusse se ġham se yā raqābat se

ye kis andāz se taktā hai terā aa.ina mujh ko

khule to sab zamānoñ ke ḳhazāne haath aa jaa.eñ

dar-e-iqlīm-e-haft-ālam hai vo band-e-qabā mujh ko

gumāñ meñ bhī gumāñ lagtī hai ab to zindagī merī

nazar aatā hai ab vo ḳhvāb meñ bhī ḳhvāb sā mujh ko

kasāfat baar pā saktī nahīñ aisī latāfat meñ

karam us kā ki baḳhshā dil ke badle aabla mujh ko

sabā merī qadam-bosī se pahle gul na dekhegī

agar vahshat ne kuchh din baaġh meñ rahne diyā mujh ko

na niklī aaj gar koī yahāñ yakjā.ī kī sūrat

to kal se DhūñDte phirnā jahāñ meñ jā-ba-jā mujh ko

guzargāh-e-nafas meñ huuñ misāl-e-barg-e-āvāra

koī dam meñ uḌā le jā.egī bād-e-fanā mujh ko

vo dil-āvez āñkheñ vo lab-o-ruḳhsār vo zulfeñ

nahīñ ab dekhnā kuchh bhī nahīñ us ke sivā mujh ko

azal se tā-abad duniyā se le kar āsmānoñ tak

nazar aatā hai terī hī nazar kā silsila mujh ko

mire hone se hī kuchh e'tibār us kā bhī qaa.em hai

junūñ tum se nimaT legā jo dīvāna kahā mujh ko

koī 'irfān' mujh meñ se mujhe āvāz detā hai

are tū sochtā kyā hai kabhī kuchh to batā mujh ko

junun ke dam se aaKHir martaba kaisa mila mujh ko

abhi farhad-o-qais aae the kahne marhaba mujh ko

kisi surat bhi rad hota nahin ye faisla dil ka

nazar aata nahin koi bhi tujh sa dusra mujh ko

sar-e-kunj-e-tamanna phir KHushi se gungunaunga

agar wo lauT kar aae to phir tum dekhna mujh ko

na jaan-e-rashk se ghusse se gham se ya raqabat se

ye kis andaz se takta hai tera aaina mujh ko

khule to sab zamanon ke KHazane hath aa jaen

dar-e-iqlim-e-haft-alam hai wo band-e-qaba mujh ko

guman mein bhi guman lagti hai ab to zindagi meri

nazar aata hai ab wo KHwab mein bhi KHwab sa mujh ko

kasafat bar pa sakti nahin aisi latafat mein

karam us ka ki baKHsha dil ke badle aabla mujh ko

saba meri qadam-bosi se pahle gul na dekhegi

agar wahshat ne kuchh din bagh mein rahne diya mujh ko

na nikli aaj gar koi yahan yakjai ki surat

to kal se DhunDte phirna jahan mein ja-ba-ja mujh ko

guzargah-e-nafas mein hun misal-e-barg-e-awara

koi dam mein uDa le jaegi baad-e-fana mujh ko

wo dil-awez aankhen wo lab-o-ruKHsar wo zulfen

nahin ab dekhna kuchh bhi nahin us ke siwa mujh ko

azal se ta-abad duniya se le kar aasmanon tak

nazar aata hai teri hi nazar ka silsila mujh ko

mere hone se hi kuchh e'tibar us ka bhi qaem hai

junun tum se nimaT lega jo diwana kaha mujh ko

koi 'irfan' mujh mein se mujhe aawaz deta hai

are tu sochta kya hai kabhi kuchh to bata mujh ko