junun ke hath se KHwar-o-KHajil nahin hota

junūñ ke haath se ḳhvār-o-ḳhajil nahīñ hotā

jo apne aap meñ itnā muḳhil nahīñ hotā

kabhī kabhī nikal aatā huuñ apne aap se maiñ

kabhī kabhī mire siine meñ dil nahīñ hotā

ġhamoñ ne kī hai salīqe se tarbiyat merī

maiñ baat baat pe ab mushta'il nahīñ hotā

tujhe milī hai pazīrā.ī to ġhurūr na kar

kisī kā nām-o-nishāñ mustaqil nahīñ hotā

jo har mahīne utartā hai mere logoñ par

'azāb hotā hai bijlī kā bill nahīñ hotā

kisī kisī pe 'ināyat ḳhudā kī hotī hai

har ik hasīn ke hoñToñ pe til nahīñ hotā

zamīñ pe baiTh ke kartā huuñ girya-o-zārī

yahī sabab hai ki be-āb-o-gil nahīñ hotā

ye aur baat ki bardāsht kar liyā maiñ ne

vagarna kaun sā ġham jāñ-gusil nahīñ hotā

bahut Thikāne haiñ us shaḳhs ke magar phir bhī

vo mere dil se kahīñ muntaqil nahīñ hotā

ḳhushā vo aañkh jo nam se chamaktī rahtī hai

ḳhushā vo dil ki jo patthar kī sil nahīñ hotā

jigar ke ghaav ko chāragarī se kyā matlab

ye zaḳhm vo hai ki jo mundamil nahīñ hotā

vahī to hotā hai kuchh kar guzarne kā lamha

maiñ apne aap se jab muttasil nahīñ hotā

junun ke hath se KHwar-o-KHajil nahin hota

jo apne aap mein itna muKHil nahin hota

kabhi kabhi nikal aata hun apne aap se main

kabhi kabhi mere sine mein dil nahin hota

ghamon ne ki hai saliqe se tarbiyat meri

main baat baat pe ab mushta'il nahin hota

tujhe mili hai pazirai to ghurur na kar

kisi ka nam-o-nishan mustaqil nahin hota

jo har mahine utarta hai mere logon par

'azab hota hai bijli ka bill nahin hota

kisi kisi pe 'inayat KHuda ki hoti hai

har ek hasin ke honTon pe til nahin hota

zamin pe baiTh ke karta hun girya-o-zari

yahi sabab hai ki be-ab-o-gil nahin hota

ye aur baat ki bardasht kar liya main ne

wagarna kaun sa gham jaan-gusil nahin hota

bahut Thikane hain us shaKHs ke magar phir bhi

wo mere dil se kahin muntaqil nahin hota

KHusha wo aankh jo nam se chamakti rahti hai

KHusha wo dil ki jo patthar ki sil nahin hota

jigar ke ghaw ko chaaragari se kya matlab

ye zaKHm wo hai ki jo mundamil nahin hota

wahi to hota hai kuchh kar guzarne ka lamha

main apne aap se jab muttasil nahin hota