junun ke shahr se guzar nahin hua to kya hua

junūñ ke shahr se guzar nahīñ huā to kyā huā

agar ye mā'raka bhī sar nahīñ huā to kyā huā

ye soch kar guzār deñge chaar din kī zindagī

koī hamārā ham-safar nahīñ huā to kyā huā

shab-e-visāl ke hamāre jism par nishān haiñ

hamārā 'ishq mo'tabar nahīñ huā to kyā huā

mire kisī raqīb kī du'ā qubūl ho ga.ī

nasīb kū-e-yār gar nahīñ huā to kyā huā

havā ne kyoñ banā liyā hai fāsla charāġh se

javāb do ye ḳhauf-o-Dar nahīñ huā to kyā huā

vo be-panah hasīn hai so maiñ faqat hasīn huuñ

hasīn huuñ hasīn-tar nahīñ huā to kyā huā

yahāñ pe sabr kījiye ye kār-zār-e-‘ishq hai

jo chāhte the vo agar nahīñ huā to kyā huā

ye shahr hai yahāñ ke log kab vafā-parast haiñ

vafā kā zikr rāt-bhar nahīñ huā to kyā huā

har ek shai palaT rahī hai apnī asl kī taraf

agar maiñ āḳhirī bashar nahīñ huā to kyā huā

hamārā mas.ala hai ham ḳhudā se kyoñ gila kareñ

vo mehvar-e-dil-o-nazar nahīñ huā to kyā huā

junun ke shahr se guzar nahin hua to kya hua

agar ye ma'raka bhi sar nahin hua to kya hua

ye soch kar guzar denge chaar din ki zindagi

koi hamara ham-safar nahin hua to kya hua

shab-e-visal ke hamare jism par nishan hain

hamara 'ishq mo'tabar nahin hua to kya hua

mere kisi raqib ki du'a qubul ho gai

nasib ku-e-yar gar nahin hua to kya hua

hawa ne kyon bana liya hai fasla charagh se

jawab do ye KHauf-o-Dar nahin hua to kya hua

wo be-panah hasin hai so main faqat hasin hun

hasin hun hasin-tar nahin hua to kya hua

yahan pe sabr kijiye ye kar-zar-e-‘ishq hai

jo chahte the wo agar nahin hua to kya hua

ye shahr hai yahan ke log kab wafa-parast hain

wafa ka zikr raat-bhar nahin hua to kya hua

har ek shai palaT rahi hai apni asl ki taraf

agar main aaKHiri bashar nahin hua to kya hua

hamara masala hai hum KHuda se kyon gila karen

wo mehwar-e-dil-o-nazar nahin hua to kya hua