junun ki aaD le kar aap se begana ho jae

junūñ kī aaḌ le kar aap se begāna ho jaa.e

bahut hushiyār hai dānista jo dīvāna ho jaa.e

mazāq-e-ishq paiham laġhzish-e-mastāna ho jaa.e

jise dīvāna kah deñ aap vo dīvāna ho jaa.e

agar dast-e-ajal kā aasrā paa.e na duniyā meñ

hujūm-e-dard-o-ġham se aadmī dīvāna ho jaa.e

tumhāre dard kā ġham kā alam kā soz-e-paiham kā

agar tartīb de luuñ maiñ to ik afsāna ho jaa.e

dobāra tuur par jab bhī naqāb-e-ruḳh uThā deñ vo

zamāna sho.ala-hā-e-husn kā parvāna ho jaa.e

use labbaik kahtī hai hayāt-e-jāvidāñ baḌh kar

jo ġham par jaan de jo ishq kā dīvāna ho jaa.e

nigāh-e-nāz meñ ho kaash shān-e-barhamī paidā

mukammal zindagī se maut kā afsāna ho jaa.e

use manzil se kyā matlab zamāna us kī manzil hai

ḳhayāl-e-manzil-e-maqsad se jo begāna ho jaa.e

'vakīl' ab tak sadā.eñ tuur kī mahfil se aatī haiñ

jise kuchh hosh meñ rahnā ho vo dīvāna ho jaa.e

junun ki aaD le kar aap se begana ho jae

bahut hushiyar hai danista jo diwana ho jae

mazaq-e-ishq paiham laghzish-e-mastana ho jae

jise diwana kah den aap wo diwana ho jae

agar dast-e-ajal ka aasra pae na duniya mein

hujum-e-dard-o-gham se aadmi diwana ho jae

tumhaare dard ka gham ka alam ka soz-e-paiham ka

agar tartib de lun main to ek afsana ho jae

dobara tur par jab bhi naqab-e-ruKH uTha den wo

zamana shoala-ha-e-husn ka parwana ho jae

use labbaik kahti hai hayat-e-jawidan baDh kar

jo gham par jaan de jo ishq ka diwana ho jae

nigah-e-naz mein ho kash shan-e-barhami paida

mukammal zindagi se maut ka afsana ho jae

use manzil se kya matlab zamana us ki manzil hai

KHayal-e-manzil-e-maqsad se jo begana ho jae

'wakil' ab tak sadaen tur ki mahfil se aati hain

jise kuchh hosh mein rahna ho wo diwana ho jae