junun ki ek mukammal dastan malum hoti hai

junūñ kī ik mukammal dāstāñ ma.alūm hotī hai

mirī hastī tamāshā-e-jahāñ ma.alūm hotī hai

mohabbat ko ye duniyā vaj.h-e-ġham kahtī hai kyoñ āḳhir

mujhe to ye nashāt-e-be-karāñ ma.alūm hotī hai

ik aisā vaqt bhī aatā hai daurān-e-mohabbat meñ

dil-e-muztar kī har dhaḌkan fuġhāñ ma.alūm hotī hai

ḳhudā shāhid hai jis din se nigāheñ tum ne pherīñ haiñ

mujhe ye zindagī bār-e-garāñ ma.alūm hotī hai

ḳhulūs-o-mehr-o-ulfat jazba-e-īsār kis meñ hai

'ziyā' ye baat vaqt-e-imtihāñ ma.alūm hotī hai

junun ki ek mukammal dastan malum hoti hai

meri hasti tamasha-e-jahan malum hoti hai

mohabbat ko ye duniya wajh-e-gham kahti hai kyon aaKHir

mujhe to ye nashat-e-be-karan malum hoti hai

ek aisa waqt bhi aata hai dauran-e-mohabbat mein

dil-e-muztar ki har dhaDkan fughan malum hoti hai

KHuda shahid hai jis din se nigahen tum ne pherin hain

mujhe ye zindagi bar-e-garan malum hoti hai

KHulus-o-mehr-o-ulfat jazba-e-isar kis mein hai

'ziya' ye baat waqt-e-imtihan malum hoti hai