junun mein mashq-e-tasawwur baDha raha hun main

junūñ meñ mashq-e-tasavvur baḌhā rahā huuñ maiñ

vo paas aa.e to ab duur jā rahā huuñ maiñ

fazā-e-gulshan-e-hastī pe chhā rahā huuñ maiñ

tire karam kā karishma dikhā rahā huuñ maiñ

vo chaar tinke jinheñ barq bhī jalā na sake

inhīñ se apnā nasheman banā rahā huuñ maiñ

hai aadmī kā muqaddar ḳhud us ke hāthoñ meñ

kuchh is fareb meñ bhī mubtalā rahā huuñ maiñ

ubhar rahe haiñ fasāne haqīqateñ ban kar

haqīqatoñ ko fasāne banā rahā huuñ maiñ

kuchh aur qissa-e-dār-o-rasan sunā vaa.iz

ki is ḳhayāl se taskīn pā rahā huuñ maiñ

vo ik nazar ki jise jān-e-mudda.ā kahiye

usī nazar ko tirī DhūñDhtā rahā huuñ maiñ

nahīñ huuñ maslahat-andesh haq-bayānī meñ

yahī hai jurm sazā jis kī pā rahā huuñ maiñ

samajh chukā huuñ haqīqat hayāt-e-fānī kī

vufūr-e-ġham meñ bhī ab muskurā rahā huuñ maiñ

kamāl-e-faiz-e-mohabbat nahīñ to phir kyā hai

ki zarre zarre meñ ab un ko pā rahā huuñ maiñ

unheñ ba-īñ ḳhirad-o-hosh pā sakā na kabhī

matā-e-hosh-o-ḳhirad kho ke pā rahā huuñ maiñ

rah-e-majāz-o-haqīqat ke moḌ par 'zauqī'

khaḌā huā huuñ magar laḌkhaḌā rahā huuñ maiñ

junun mein mashq-e-tasawwur baDha raha hun main

wo pas aae to ab dur ja raha hun main

faza-e-gulshan-e-hasti pe chha raha hun main

tere karam ka karishma dikha raha hun main

wo chaar tinke jinhen barq bhi jala na sake

inhin se apna nasheman bana raha hun main

hai aadmi ka muqaddar KHud us ke hathon mein

kuchh is fareb mein bhi mubtala raha hun main

ubhar rahe hain fasane haqiqaten ban kar

haqiqaton ko fasane bana raha hun main

kuchh aur qissa-e-dar-o-rasan suna waiz

ki is KHayal se taskin pa raha hun main

wo ek nazar ki jise jaan-e-muddaa kahiye

usi nazar ko teri DhunDhta raha hun main

nahin hun maslahat-andesh haq-bayani mein

yahi hai jurm saza jis ki pa raha hun main

samajh chuka hun haqiqat hayat-e-fani ki

wufur-e-gham mein bhi ab muskura raha hun main

kamal-e-faiz-e-mohabbat nahin to phir kya hai

ki zarre zarre mein ab un ko pa raha hun main

unhen ba-in KHirad-o-hosh pa saka na kabhi

mata-e-hosh-o-KHirad kho ke pa raha hun main

rah-e-majaz-o-haqiqat ke moD par 'zauqi'

khaDa hua hun magar laDkhaDa raha hun main