junun se kasb jo kar li hai be-KHudi maine

junūñ se kasb jo kar lī hai be-ḳhudī maiñ ne

ġham-e-firāq ko baḳhshī hai zindagī maiñ ne

na duur mere tasavvur se jā mire hamdam

tire ḳhayāl ko samjhā hai bandagī maiñ ne

nahīñ ye sheva-e-ulfat ki husn ho rusvā

pasand tere liye kī hai ḳhāmushī maiñ ne

nahīñ hai ḳhauf mujhe tīrgī kā rāhoñ kī

ki zulmatoñ meñ bhī kar lī hai raushnī maiñ ne

chhupā rahā thā magar sādgī mirī 'tālib'

pate kī baat bhī kah dī hañsī hañsī maiñ ne

junun se kasb jo kar li hai be-KHudi main ne

gham-e-firaq ko baKHshi hai zindagi main ne

na dur mere tasawwur se ja mere hamdam

tere KHayal ko samjha hai bandagi main ne

nahin ye shewa-e-ulfat ki husn ho ruswa

pasand tere liye ki hai KHamushi main ne

nahin hai KHauf mujhe tirgi ka rahon ki

ki zulmaton mein bhi kar li hai raushni main ne

chhupa raha tha magar sadgi meri 'talib'

pate ki baat bhi kah di hansi hansi main ne