jurat-e-izhaar ka uqda yahan kaise khule

jur.at-e-iz.hār kā uqda yahāñ kaise khule

maslahat kā biim dil meñ hai zabāñ kaise khule

be-dilī se hai rag-o-pai meñ lahū Thahrā huā

aañkh meñ poshīda zaḳhmoñ kā nishāñ kaise khule

dām-e-sāhil hai safīne kī asīrī kā sabab

sar paTaktā huuñ ki ab ye bādbāñ kaise khule

harf-e-mub.ham kī tarah aurāq-e-roz-o-shab meñ huuñ

raaz āḳhir dushmanoñ ke darmiyāñ kaise khule

har ghaḌī dastak koī detā hai andar se mujhe

sochtā rahtā huuñ bāb-e-jism-o-jāñ kaise khule

lafz haiñ shāhid mirī tahrīr ke afsurda lab

sher meñ poshīda ma.anī kā jahāñ kaise khule

jurat-e-izhaar ka uqda yahan kaise khule

maslahat ka bim dil mein hai zaban kaise khule

be-dili se hai rag-o-pai mein lahu Thahra hua

aankh mein poshida zaKHmon ka nishan kaise khule

dam-e-sahil hai safine ki asiri ka sabab

sar paTakta hun ki ab ye baadban kaise khule

harf-e-mubham ki tarah auraq-e-roz-o-shab mein hun

raaz aaKHir dushmanon ke darmiyan kaise khule

har ghaDi dastak koi deta hai andar se mujhe

sochta rahta hun bab-e-jism-o-jaan kaise khule

lafz hain shahid meri tahrir ke afsurda lab

sher mein poshida mani ka jahan kaise khule