jurm kya hai jo rahen aap ke hum dil ke qarib

jurm kyā hai jo raheñ aap ke ham dil ke qarīb

kyā nahīñ rahte sitāre mah-e-kāmil ke qarīb

jā ke kahtī hai jafā panja-e-qātil ke qarīb

aur kuchh der Thahar jā.iye bismil ke qarīb

kyā sabab hai ki uThā shor gulistāñ meñ nadīm

fasl-e-gul aa.ī ki vo aa.e anādil ke qarīb

zindagī karte haiñ jo sīna-e-dariyā pe basar

lutf kyā ḳhaak milegā unheñ sāhil ke qarīb

ham vo parvarda-e-tūfāñ haiñ pas-e-marg jinheñ

dafn honā bhī gavārā nahīñ sāhil ke qarīb

aa hī jā.eñge nazar chashm-e-basīrat ho agar

vo yahīñ hoñge yahīñ hoñge kahīñ dil ke qarīb

tum qarīb itne mire aao ki miT jaa.e duī

fāsla ye bhī bahut hai ki raheñ dil ke qarīb

dil tirā gar na bane aa.ina merā zimma

rah ke tū dekh to le jauhar-e-qābil ke qarīb

be-kasī rotī hai us ābla-pā rahrav par

thak ke jo baiTh gayā raah meñ manzil ke qarīb

aks ko un ke basā letā maiñ āñkhoñ meñ 'kamāl'

kaash vo aate kabhī dīda-e-bismil ke qarīb

jurm kya hai jo rahen aap ke hum dil ke qarib

kya nahin rahte sitare mah-e-kaamil ke qarib

ja ke kahti hai jafa panja-e-qatil ke qarib

aur kuchh der Thahar jaiye bismil ke qarib

kya sabab hai ki uTha shor gulistan mein nadim

fasl-e-gul aai ki wo aae anadil ke qarib

zindagi karte hain jo sina-e-dariya pe basar

lutf kya KHak milega unhen sahil ke qarib

hum wo parwarda-e-tufan hain pas-e-marg jinhen

dafn hona bhi gawara nahin sahil ke qarib

aa hi jaenge nazar chashm-e-basirat ho agar

wo yahin honge yahin honge kahin dil ke qarib

tum qarib itne mere aao ki miT jae dui

fasla ye bhi bahut hai ki rahen dil ke qarib

dil tera gar na bane aaina mera zimma

rah ke tu dekh to le jauhar-e-qabil ke qarib

be-kasi roti hai us aabla-pa rahraw par

thak ke jo baiTh gaya rah mein manzil ke qarib

aks ko un ke basa leta main aankhon mein 'kamal'

kash wo aate kabhi dida-e-bismil ke qarib