justuju-e-manzil ke raste hazaron hain

justujū-e-manzil ke rāste hazāroñ haiñ

koī qāfila chun lo qāfile hazāroñ haiñ

sang-o-shīsha Takrā kar TūTte haiñ to TūTeñ

be-shumār patthar haiñ aa.ine hazāroñ haiñ

log jhuuT kahte haiñ ḳhush haiñ zindagānī meñ

aadmī kī hastī meñ mas.ale hazāroñ haiñ

ye na samjho maqtal kī ḳhatm ho ga.iiñ rasmeñ

ab bhī āzmā.ish ke marhale hazāroñ haiñ

maiñ huuñ ek parvāna jaan duuñ to kis par duuñ

be-shumār sham.eñ haiñ aur diye hazāroñ haiñ

bijliyāñ bahut sī haiñ ai falak tire sar meñ

is zamīñ ke dil meñ bhī zalzale hazāroñ haiñ

diin se bhalā koī falsafa nahīñ 'merāj'

vaise is zamāne meñ falsafe hazāroñ haiñ

justuju-e-manzil ke raste hazaron hain

koi qafila chun lo qafile hazaron hain

sang-o-shisha Takra kar TuTte hain to TuTen

be-shumar patthar hain aaine hazaron hain

log jhuT kahte hain KHush hain zindagani mein

aadmi ki hasti mein masale hazaron hain

ye na samjho maqtal ki KHatm ho gain rasmen

ab bhi aazmaish ke marhale hazaron hain

main hun ek parwana jaan dun to kis par dun

be-shumar shamen hain aur diye hazaron hain

bijliyan bahut si hain ai falak tere sar mein

is zamin ke dil mein bhi zalzale hazaron hain

din se bhala koi falsafa nahin 'meraj'

waise is zamane mein falsafe hazaron hain