junhi dekha teri raushan-jabin ka nur KHalwat mein

jūñhī dekhā tirī raushan-jabīñ kā nuur ḳhalvat meñ

hai mahv-e-rashk koh-e-qāf kī vo huur ḳhalvat meñ

tirī yādoñ ne kar Daalā hameñ majbūr ḳhalvat meñ

chhalak uTThā hai palkoñ se ġham-e-mastūr ḳhalvat meñ

mirī sāñseñ mahaktī haiñ tirī ḳhushbū se aksar yuuñ

juuñ koī ġhuncha-e-dil ho tirā mazkūr ḳhalvat meñ

aziyyat-nāk rātoñ meñ sisaktī haiñ tumhāre bin

mire kamre kī dīvāreñ ġhamoñ se chuur ḳhalvat meñ

shikam ḳhālī badan nangā hai pairoñ meñ thakan pahne

liye bachchoñ ko rotā hai koī mazdūr ḳhalvat meñ

shab-e-hijrāñ kī tanhā.ī tirī furqat kā ġham is par

shikasta dil hai yuuñ bhī zabt se māmūr ḳhalvat meñ

vabā phailī hai aalam meñ jidhar dekho udhar 'afzal'

munāsib hai ki rahiye ab sabhī se duur ḳhalvat meñ

junhi dekha teri raushan-jabin ka nur KHalwat mein

hai mahw-e-rashk koh-e-qaf ki wo hur KHalwat mein

teri yaadon ne kar Dala hamein majbur KHalwat mein

chhalak uTTha hai palkon se gham-e-mastur KHalwat mein

meri sansen mahakti hain teri KHushbu se aksar yun

jun koi ghuncha-e-dil ho tera mazkur KHalwat mein

aziyyat-nak raaton mein sisakti hain tumhaare bin

mere kamre ki diwaren ghamon se chur KHalwat mein

shikam KHali badan nanga hai pairon mein thakan pahne

liye bachchon ko rota hai koi mazdur KHalwat mein

shab-e-hijran ki tanhai teri furqat ka gham is par

shikasta dil hai yun bhi zabt se mamur KHalwat mein

waba phaili hai aalam mein jidhar dekho udhar 'afzal'

munasib hai ki rahiye ab sabhi se dur KHalwat mein