juz tere mere pesh-e-nazar kuchh bhi nahin hai

juz tere mire pesh-e-nazar kuchh bhī nahīñ hai

tū saath ho phir ḳhauf-o-ḳhatar kuchh bhī nahīñ hai

ik kashf-e-mohabbat se badal jaatā hai kyā kuchh

ab tāroñ kī gardish kā asar kuchh bhī nahīñ hai

har roz na.e pahlū se samjhā karūñ tujh ko

gum aisī huuñ ki ḳhud kī ḳhabar kuchh bhī nahīñ hai

ḳhushbū kī tarah an-kahe ehsās samajh tū

hasrat hai bahut kahnā magar kuchh bhī nahīñ hai

sab kuchh hai tujhī se ai ḳhayābān-e-mohabbat

bin tere ye aalam ye nagar kuchh bhī nahīñ hai

tū hī ġham-e-daurāñ meñ qarīb-e-rag-e-jāñ hai

māñjhī ho jo tujh sā to bhañvar kuchh bhī nahīñ hai

ik tere hī ehsās se mānūs hai ye dil

ehsās kā unvān-e-digar kuchh bhī nahīñ hai

juz tere mere pesh-e-nazar kuchh bhi nahin hai

tu sath ho phir KHauf-o-KHatar kuchh bhi nahin hai

ek kashf-e-mohabbat se badal jata hai kya kuchh

ab taron ki gardish ka asar kuchh bhi nahin hai

har roz nae pahlu se samjha karun tujh ko

gum aisi hun ki KHud ki KHabar kuchh bhi nahin hai

KHushbu ki tarah an-kahe ehsas samajh tu

hasrat hai bahut kahna magar kuchh bhi nahin hai

sab kuchh hai tujhi se ai KHayaban-e-mohabbat

bin tere ye aalam ye nagar kuchh bhi nahin hai

tu hi gham-e-dauran mein qarib-e-rag-e-jaan hai

manjhi ho jo tujh sa to bhanwar kuchh bhi nahin hai

ek tere hi ehsas se manus hai ye dil

ehsas ka unwan-e-digar kuchh bhi nahin hai