juzw-e-jaan rahta hai daim jo gham-e-jaan ho kar

juzv-e-jāñ rahtā hai daa.im jo ġham-e-jāñ ho kar

aql taktī hai use shashdar-o-hairāñ ho kar

sochtā huuñ ki vahī manzil-e-idrāk na ho

zehn baiThā hai jahāñ sar-ba-garebāñ ho kar

jal-bujhe ḳhaak hue us pe qayāmat ye hai

ham ko jiinā bhī paḌā soḳhta-sāmāñ ho kar

qissa-e-ḳhāna-e-barbād na pūchho ham se

ab vatan meñ kabhī jā.eñge to mehmāñ ho kar

mujh ko kar detī haiñ ilhām-e-bashar kā qaa.il

merī ḳhushiyāñ tire chehre se numāyāñ ho kar

un se va.ada bhī liyā dil kī ḳhalish bhī na miTī

muft rusvā hue sharminda-e-ehsāñ ho kar

kyā chalā.egā vo girdāb meñ kashtī ai 'arsh'

mauj-e-sāhil bhī Darā.e jise tūfāñ ho kar

juzw-e-jaan rahta hai daim jo gham-e-jaan ho kar

aql takti hai use shashdar-o-hairan ho kar

sochta hun ki wahi manzil-e-idrak na ho

zehn baiTha hai jahan sar-ba-gareban ho kar

jal-bujhe KHak hue us pe qayamat ye hai

hum ko jina bhi paDa soKHta-saman ho kar

qissa-e-KHana-e-barbaad na puchho hum se

ab watan mein kabhi jaenge to mehman ho kar

mujh ko kar deti hain ilham-e-bashar ka qail

meri KHushiyan tere chehre se numayan ho kar

un se wada bhi liya dil ki KHalish bhi na miTi

muft ruswa hue sharminda-e-ehsan ho kar

kya chalaega wo girdab mein kashti ai 'arsh'

mauj-e-sahil bhi Darae jise tufan ho kar