kabe ka tamannai hai koi mushtaq koi but-KHane ka

ka.abe kā tamannā.ī hai koī mushtāq koī but-ḳhāne kā

in aql ke dīvāne se judā aalam hai tire dīvāne kā

nāseh tū nasīhat dil ko na kar mauqa ye nahīñ samjhāne kā

jaanā hai sū-e-bazm-e-jānāñ ik soz liye parvāne kā

is rang-birangī duniyā meñ ārām-o-sukūñ kā naam nahīñ

dīvānoñ ke dil se to pūchho kyā aalam hai vīrāne kā

ik ālam-e-kaif-o-mastī meñ dāḳhil jo hue maiḳhāne meñ

saaqī ko kiyā sajda jhuk kar muñh chuum liyā paimāne kā

kah do ye farāġhat vāloñ se duniyā meñ sañbhal kar rahnā hai

kal tak jo yahāñ āsūda thā muhtāj hai daane daane kā

sab muft gañvāyā paas jo thā ab 'zabt' chalo tum apne ghar

jī bhar ke tamāshā dekh chuke duniyā ke ajā.ib-ḳhāne kā

kabe ka tamannai hai koi mushtaq koi but-KHane ka

in aql ke diwane se juda aalam hai tere diwane ka

naseh tu nasihat dil ko na kar mauqa ye nahin samjhane ka

jaana hai su-e-bazm-e-jaanan ek soz liye parwane ka

is rang-birangi duniya mein aaram-o-sukun ka nam nahin

diwanon ke dil se to puchho kya aalam hai virane ka

ek aalam-e-kaif-o-masti mein daKHil jo hue maiKHane mein

saqi ko kiya sajda jhuk kar munh chum liya paimane ka

kah do ye faraghat walon se duniya mein sanbhal kar rahna hai

kal tak jo yahan aasuda tha muhtaj hai dane dane ka

sab muft ganwaya pas jo tha ab 'zabt' chalo tum apne ghar

ji bhar ke tamasha dekh chuke duniya ke ajaib-KHane ka