kabe se ranj hai na adawat kunisht se

ka.abe se ranj hai na adāvat kunisht se

dil ye bahal na pā.egā apnā bahisht se

is aarzū meñ ek hī pal ko sukūñ mile

ham dil badal rahe haiñ tire sang-o-ḳhisht se

ik tum hī the na jis ko kabhī raas aa sakī

duniyā ye chal rahī hai mirī sarguzisht se

rāh-e-vafā meñ ab kyā luTāoge soch lo

dāḳhil to ho ga.e ho dil-o-jāñ kī kisht se

jis se azāb-e-ishq kī tāqat meñ ho kamī

muñh ham nahīñ lagāte kabhī us palisht se

dil hai ke raqs kartā hai zanjīr bāñdh kar

lag kar kahīñ na baiThā ho ye ahl-e-chisht se

har gosha hai sukūn ke āb-e-baqā se tar

bāhar nikal ke dekh zarā ḳhūb-o-zisht se

baḌh kar junūñ ne kar hī diyā āsmāñ buland

ta.alīm le rahā thā vo merī sarisht se

Thahro 'nadīm' saañs to lene do zo.af meñ

ghabrā rahā hai ishq mire sar-navisht se

kabe se ranj hai na adawat kunisht se

dil ye bahal na paega apna bahisht se

is aarzu mein ek hi pal ko sukun mile

hum dil badal rahe hain tere sang-o-KHisht se

ek tum hi the na jis ko kabhi ras aa saki

duniya ye chal rahi hai meri sarguzisht se

rah-e-wafa mein ab kya luTaoge soch lo

daKHil to ho gae ho dil-o-jaan ki kisht se

jis se azab-e-ishq ki taqat mein ho kami

munh hum nahin lagate kabhi us palisht se

dil hai ke raqs karta hai zanjir bandh kar

lag kar kahin na baiTha ho ye ahl-e-chisht se

har gosha hai sukun ke aab-e-baqa se tar

bahar nikal ke dekh zara KHub-o-zisht se

baDh kar junun ne kar hi diya aasman buland

talim le raha tha wo meri sarisht se

Thahro 'nadim' sans to lene do zoaf mein

ghabra raha hai ishq mere sar-nawisht se