kafir ko baad mein hi musalman kijiye

kāfir ko baad meñ hī musalmān kījiye

pahle to aadmī hī ko insān kījiye

ābād ab to ye dil-e-vīrān kījiye

mehmān kar ke ḳhātir-e-mehmān kījiye

us but se baat kījiye na saum-o-salāt kī

kuchh to ḳhayāl dushman-e-īmān kījiye

mehr-o-vafā ke baab meñ diije na daḳhl aap

mujh par ye mehrbānī meherbān kījiye

merī sazā jazā ai farishto na tolnā

pahle zarā marammat-e-mīzān kījiye

ghabrā.iye na dekh ke siine kā zer-o-bam

ma.alūm pahle bā.is-e-haijān kījiye

dekho na māh-ruḳh ko kahīñ bad-nazar lage

kuchh ehtimām hāfiz-e-qur.ān kījiye

baiThā rahūñ hamesha yūñhī aap ke huzūr

mujh par mire huzūr ye ehsān kījiye

aa.e to chaar din ko magar saal ho ga.e

'shāhid' yahāñ se kuuch kā sāmān kījiye

kafir ko baad mein hi musalman kijiye

pahle to aadmi hi ko insan kijiye

aabaad ab to ye dil-e-viran kijiye

mehman kar ke KHatir-e-mehman kijiye

us but se baat kijiye na saum-o-salat ki

kuchh to KHayal dushman-e-iman kijiye

mehr-o-wafa ke bab mein dije na daKHl aap

mujh par ye mehrbani meherban kijiye

meri saza jaza ai farishto na tolna

pahle zara marammat-e-mizan kijiye

ghabraiye na dekh ke sine ka zer-o-bam

malum pahle bais-e-haijaan kijiye

dekho na mah-ruKH ko kahin bad-nazar lage

kuchh ehtimam hafiz-e-quran kijiye

baiTha rahun hamesha yunhi aap ke huzur

mujh par mere huzur ye ehsan kijiye

aae to chaar din ko magar sal ho gae

'shahid' yahan se kuch ka saman kijiye