کافر کو بعد میں ہی مسلمان کیجئے

کافر کو بعد میں ہی مسلمان کیجئے

پہلے تو آدمی ہی کو انسان کیجئے

آباد اب تو یہ دل ویران کیجئے

مہمان کر کے خاطر مہمان کیجئے

اس بت سے بات کیجئے نہ صوم و صلٰوۃ کی

کچھ تو خیال دشمن ایمان کیجئے

مہر و وفا کے باب میں دیجے نہ دخل آپ

مجھ پر یہ مہربانی مہربان کیجئے

میری سزا جزا اے فرشتو نہ تولنا

پہلے ذرا مرمت میزان کیجئے

گھبرائیے نہ دیکھ کے سینے کا زیر و بم

معلوم پہلے باعث ہیجان کیجئے

دیکھو نہ ماہ رخ کو کہیں بد نظر لگے

کچھ اہتمام حافظ قرآن کیجئے

بیٹھا رہوں ہمیشہ یوں ہی آپ کے حضور

مجھ پر مرے حضور یہ احسان کیجئے

آئے تو چار دن کو مگر سال ہو گئے

شاہدؔ یہاں سے کوچ کا سامان کیجئے