kakul ki tarah baKHt bhi bal khae hue hai

kākul kī tarah baḳht bhī bal khaa.e hue hai

kyuuñ aaj muqaddar mujhe uljhā.e hue hai

zanjīr-e-mehan paañv meñ pahnā.e hue hai

yā jalva-e-jānāñ mujhe bahlā.e hue hai

le jaa.e mujhe sū-e-chaman ab na bahārāñ

dil qismat-e-zindāñ kī qasam khaa.e hue hai

maiñ band qafas meñ huuñ magar fikr-e-nasheman

siine meñ jigar dard se barmā.e hue hai

suljhegī na mashshātagī-e-aql-o-ḳhirad se

vo zulf-e-junūñ jis ko ki uljhā.e hue hai

us ko bhī to mil jaa.e zarā husn kā sadqa

dāmāñ talab-e-dar pe jo phailā.e hue hai

ai 'nūr' mujhe kuchh to bharosa hai zabāñ par

kuchh baḳht-e-sa.ādat mujhe garmā.e hue hai

kakul ki tarah baKHt bhi bal khae hue hai

kyun aaj muqaddar mujhe uljhae hue hai

zanjir-e-mehan panw mein pahnae hue hai

ya jalwa-e-jaanan mujhe bahlae hue hai

le jae mujhe su-e-chaman ab na bahaaran

dil qismat-e-zindan ki qasam khae hue hai

main band qafas mein hun magar fikr-e-nasheman

sine mein jigar dard se barmae hue hai

suljhegi na mashshatagi-e-aql-o-KHirad se

wo zulf-e-junun jis ko ki uljhae hue hai

us ko bhi to mil jae zara husn ka sadqa

daman talab-e-dar pe jo phailae hue hai

ai 'nur' mujhe kuchh to bharosa hai zaban par

kuchh baKHt-e-saadat mujhe garmae hue hai