kakul-o-ruKH hi nahin sham-o-sahar aur bhi hain

kākul-o-ruḳh hī nahīñ shām-o-sahar aur bhī haiñ

ek tum hī nahīñ armān-e-nazar aur bhī haiñ

dāġh-e-dil aur bhī haiñ zaḳhm-e-nazar aur bhī haiñ

sho.ala-e-gul ke sivā sho.ala-e-tar aur bhī haiñ

husn vaale tirī in nīchī nigāhoñ kī qasam

mahfil-e-husn ke ādāb-e-nazar aur bhī haiñ

ik ġham-e-dost pe mauqūf nahīñ betābi

markaz-e-silsila-e-dard-e-jigar aur bhī haiñ

masjid-o-dair-o-ḳharābāt pe kuchh ḳhatm nahīñ

dil salāmat to gulistān-e-bashar aur bhī haiñ

rāhbar thak ga.e ab dekhiye kyā hotā hai

qāfile ko abhī darpesh safar aur bhī haiñ

rahnumāoñ ke nishānāt-e-qadam hī pe na chal

ham-safar sham-e-sar-e-rāh-guzar aur bhī haiñ

zor-e-bāzū pe nahīñ bas dil-e-insāñ kī qasam

chāhe insāñ to rah-e-fat.h-o-zafar aur bhī haiñ

kakul-o-ruKH hi nahin sham-o-sahar aur bhi hain

ek tum hi nahin arman-e-nazar aur bhi hain

dagh-e-dil aur bhi hain zaKHm-e-nazar aur bhi hain

shoala-e-gul ke siwa shoala-e-tar aur bhi hain

husn wale teri in nichi nigahon ki qasam

mahfil-e-husn ke aadab-e-nazar aur bhi hain

ek gham-e-dost pe mauquf nahin betabi

markaz-e-silsila-e-dard-e-jigar aur bhi hain

masjid-o-dair-o-KHarabaat pe kuchh KHatm nahin

dil salamat to gulistan-e-bashar aur bhi hain

rahbar thak gae ab dekhiye kya hota hai

qafile ko abhi darpesh safar aur bhi hain

rahnumaon ke nishanat-e-qadam hi pe na chal

ham-safar sham-e-sar-e-rah-guzar aur bhi hain

zor-e-bazu pe nahin bas dil-e-insan ki qasam

chahe insan to rah-e-fath-o-zafar aur bhi hain