kaam baqi hai abhi kaam abhi baqi hai

kaam baaqī hai abhī kaam abhī baaqī hai

sar-e-āġhāz hai anjām abhī baaqī hai

razm-e-afkār meñ fursat hai kahāñ ahl-e-jahāñ

dard kī god meñ ārām abhī baaqī hai

ham ne har saañs ko sadqa kiyā duniyā pe tirī

haañ hisāb-e-diram-o-dām abhī baaqī hai

qatl-gāhoñ meñ utartā hai abhī sannāTā

abhī Thahro yahāñ kohrām abhī baaqī hai

raushnī ho na ho jaltā hai shabistān-e-vajūd

in siyah sho.aloñ kā ikrām abhī baaqī hai

naġhma-e-sūr karūseDī tamanna hī sahī

dosto gardish-e-ayyām abhī baaqī hai

bū-lahab ibn-e-muġhīra bhī abu-jehl bhī hai

ma.arka jaarī hai islām abhī baaqī hai

jāgnā hai jinheñ ye soch ke so jaate haiñ

raat baaqī hai abhī shaam abhī baaqī hai

bahr-e-iblīs meñ tūfān haiñ pinhāñ kitne

kahīñ hizyāñ kahīñ sarsām abhī baaqī hai

kaam baqi hai abhi kaam abhi baqi hai

sar-e-aghaz hai anjam abhi baqi hai

razm-e-afkar mein fursat hai kahan ahl-e-jahan

dard ki god mein aaram abhi baqi hai

hum ne har sans ko sadqa kiya duniya pe teri

han hisab-e-diram-o-dam abhi baqi hai

qatl-gahon mein utarta hai abhi sannaTa

abhi Thahro yahan kohram abhi baqi hai

raushni ho na ho jalta hai shabistan-e-wajud

in siyah shoalon ka ikram abhi baqi hai

naghma-e-sur karuseDi tamanna hi sahi

dosto gardish-e-ayyam abhi baqi hai

bu-lahab ibn-e-mughira bhi abu-jehl bhi hai

marka jari hai islam abhi baqi hai

jagna hai jinhen ye soch ke so jate hain

raat baqi hai abhi sham abhi baqi hai

bahr-e-iblis mein tufan hain pinhan kitne

kahin hizyan kahin sarsam abhi baqi hai