kaam har zaKHm ne marham ka kiya ho jaise

kaam har zaḳhm ne marham kā kiyā ho jaise

ab kisī se koī shikva na gilā ho jaise

umr-bhar ishq ko ġham-dīda na rakkhe kyūñkar

hādisa vo ki abhī kal hī huā ho jaise

ek muddat huī dekhā thā jise pahle-pahal

tere chehre meñ vahī chehra chhupā ho jaise

husn ke bhed kā pā lenā nahīñ hai āsāñ

hai ye vo raaz ki rāzoñ meñ palā ho jaise

duur tak ek nigah jā ke Thahar jaatī hai

vaqt kā fāsla kuchh DhūñD rahā ho jaise

yād-e-māzī se ye afsurda sī raunaq dil meñ

āḳhir-e-shab koī darvāza khulā ho jaise

hazl ko log 'sahar' aaj ġhazal kahte haiñ

zauq-e-sherī pe burā vaqt paḌā ho jaise

kaam har zaKHm ne marham ka kiya ho jaise

ab kisi se koi shikwa na gila ho jaise

umr-bhar ishq ko gham-dida na rakkhe kyunkar

hadisa wo ki abhi kal hi hua ho jaise

ek muddat hui dekha tha jise pahle-pahal

tere chehre mein wahi chehra chhupa ho jaise

husn ke bhed ka pa lena nahin hai aasan

hai ye wo raaz ki raazon mein pala ho jaise

dur tak ek nigah ja ke Thahar jati hai

waqt ka fasla kuchh DhunD raha ho jaise

yaad-e-mazi se ye afsurda si raunaq dil mein

aaKHir-e-shab koi darwaza khula ho jaise

hazl ko log 'sahar' aaj ghazal kahte hain

zauq-e-sheri pe bura waqt paDa ho jaise