kaam kuchh to lena tha apne dida-e-tar se

kaam kuchh to lenā thā apne dīda-e-tar se

kaaT diiñ ka.ī rāteñ āñsuoñ ke ḳhanjar se

niiñd hai thakan sī hai silvaTeñ haiñ yādeñ haiñ

kitne log uTheñge sub.h mere bistar se

jān-būjh kar ham ne bādbān khole haiñ

kis ko ab palaTnā hai be-karāñ samundar se

bhīgnā muzir to thā phir bhī kaisī lazzat thī

jab ghaTā.eñ uTThīñ thiiñ maiñ qarīb thā ghar se

aaj to havā bhī hai tez barf-bārī bhī

yuuñ bhī niiñd kyā aatī ik shikasta chādar se

jab bhī pā.eñge mauqa.a phuul toḌ hī leñge

bachche ruk nahīñ sakte bāġhbān ke Dar se

ai nashāt ke ziino tum ko yaad to hogā

ik salām kah denā us madīna-aḳhtar se

kaam kuchh to lena tha apne dida-e-tar se

kaT din kai raaten aansuon ke KHanjar se

nind hai thakan si hai silwaTen hain yaaden hain

kitne log uThenge subh mere bistar se

jaan-bujh kar hum ne baadban khole hain

kis ko ab palaTna hai be-karan samundar se

bhigna muzir to tha phir bhi kaisi lazzat thi

jab ghaTaen uTThin thin main qarib tha ghar se

aaj to hawa bhi hai tez barf-bari bhi

yun bhi nind kya aati ek shikasta chadar se

jab bhi paenge mauqa phul toD hi lenge

bachche ruk nahin sakte baghban ke Dar se

ai nashat ke zino tum ko yaad to hoga

ek salam kah dena us madina-aKHtar se